An natural nga mga kalamidad mas nagtitikadamu yana. Kon may nahitatabo nga kalamidad, an pagtagana hin bulig kinahanglan organisado gud ngan may maopay nga koordinasyon. Tungod hito, naghikay an Nagmamando nga Lawas nga magkaada Disaster Relief Department ha kada branch office.

Kon nahibabaroan han kabugtoan hito nga departamento nga may-ada kalamidad, ginkukontak dayon nira an lokal nga mga tigurang basi hibaroan kon ano nga bulig an ginkikinahanglan han kabugtoan. Kon duro gud an distroso diin diri ito kaya asikasuhon han lokal nga kabugtoan, magtutoka an branch hin kwalipikado nga mga kabugtoan basi manguna ha relief work. Ito nga mga kabugtoan mahimo maghangyo hin mga boluntaryo o maghangyo nga magdonar hin espisipiko nga mga butang, o mahimo hira mamalit ngan manhatag han ginkikinahanglan nga mga suplay ha ira lugar.

Damu an kaopayan ha pag-asikaso han mga butang ha sugad nga paagi. Nalilikayan hito an diri ginkikinahanglan nga mga trabaho, diri pagsinabtanay, ngan pagkarag hin mga pundo ngan mga materyales, nga mahimo mahitabo kon an kabugtoan naglilinugaring la pagbuhat han ira karuyag.

Gin-uusisa han mga kabugtoan nga gintokahan han branch kon ano kadamu nga kwarta ngan mga boluntaryo an ginkikinahanglan ha relief work. Puydi liwat hira makiistorya ha lokal nga mga opisyal, nga kasagaran na nga nakakabulig nga mapadagmit an aton relief work. Salit an mga indibiduwal diri angay maglugaring pagkolekta hin mga pundo, pagpadara hin mga relief, o pagkadto ha apektado nga lugar labot la kon hangyoon hira nga buhaton ito.

Bisan pa hito, kon may nahitatabo nga kalamidad, karuyag naton bumulig. (Heb 13:16) Hinigugma naton an aton kabugtoan! Ano an puydi naton buhaton? An pinakaimportante, puydi naton ig-ampo an mga biktima han kalamidad ngan adton nanhahatag hin relief. Puydi liwat kita maghatag hin donasyon pinaagi ha bug-os-kalibotan nga buruhaton. Ha paggiya han Nagmamando nga Lawas, an mga branch office an mas maaram kon diin pinakamaopay gamiton ini nga mga pundo. Ngan kon karuyag naton personal nga makigbahin, maipapakita naton nga andam kita bumulig pinaagi ha pagpil-ap han Local Design/Construction Volunteer Application (DC-50).

KITAA AN VIDEO NGA GRABE NGA PAGBAHA HA BRAZIL, NGAN BATONA AN MASUNOD:

Ano an nakaimpres ha imo mahitungod ha relief work han mga Saksi ni Jehova katapos han pagbaha ha Brazil han 2020?