An gugma amo an papilit nga nagbubugkos han pamilya. Kon waray gugma, makukurian an pamilya nga magpabilin nga urosa ngan nagbuburublig. Paonan-o an mga bana, asawa, ngan kag-anak makakagpakita hin gugma ha pamilya?

An mahigugmaon nga bana maghahatag hin atensyon ha panginahanglan, panhunahuna, ngan inaabat han iya asawa. (Efe 5:28, 29) Itatagana niya an pisikal ngan espirituwal nga panginahanglan han iya pamilya, upod na an pagkaada regular nga Pagsingba han Pamilya. (1Ti 5:8) An mahigugmaon nga asawa magpapasakop ha iya bana ngan magpapakita ha iya hin “daku nga respeto.” (Efe 5:22, 33; 1Pe 3:1-6) An mag-asawa kinahanglan hura nga magpasaylo ha usa kag usa. (Efe 4:32) An mahigugmaon nga mga kag-anak nagpapakita hin interes ha tagsa nira nga anak ngan nagtututdo ha ira nga higugmaon hi Jehova. (De 6:6, 7; Efe 6:4) Ano nga mga problema an naieksperyensyahan han ira mga anak ha eskwelahan? Paonan-o nira gin-aatubang an pagpresyur han iba nga batan-on? Kon an ngatanan nga membro han pamilya naghihigugmaay, maabat hira nga talwas ngan protektado.

KITAA AN VIDEO NGA PAGPAKITA HIN DIRI NAPAPAKYAS NGA GUGMA HA IYO PAMILYA, NGAN BATONA AN MASUNOD:

• Paonan-o an mahigugmaon nga bana nagpapakaon ngan nagmamayuyo ha iya asawa?

• Paonan-o an mahigugmaon nga asawa nagpapakita hin daku nga respeto ha iya bana?

• Paonan-o an mahigugmaon nga mga kag-anak nagpapasilsil han Pulong han Dios ha ira mga anak?