Basi mapalipay an Dios, an mga Bible study kinahanglan magkaada marig-on nga pagtoo. (Heb 11:6) Maaabot naton an ira kasingkasing gamit an libro nga Mabuhi hin Malipayon ha Waray Kataposan! May-ada ini mga teksto nga nagpapabug-at han nangunguna nga mga punto, klaro nga pangatadongan, epektibo nga mga pakiana, makapabantad nga mga video, ngan mag-opay nga retrato. Kon ginbubuligan naton an estudyante nga magkultibar hin Kristiano nga mga kalidad ngan magkaada relasyon ha Dios, nagtutukod kita gamit an mga materyales nga diri nasusunog.​—1Co 3:12-15.

An iba nakukurian paghunahuna nga magigin sangkay nira an Dios nga diri nira nakikita. Salit kinahanglan buligan naton hira nga makilala hi Jehova ngan sumarig ha iya.

KITAA AN VIDEO NGA PARIG-ONA AN PAGTOO KAN JEHOVA, GAMIT AN “MABUHI HIN MALIPAYON HA WARAY KATAPOSAN!” NGAN BATONA AN MASUNOD:

• Kay ano nga makakasiring kita nga an sister nangandam hin maopay para ha ira pag-aram?

• Paonan-o hiya ginamit hin dugang nga mga pakiana basi buligan an estudyante nga ipahayag an iya panhunahuna ngan inaabat mahitungod ha Isaias 41:10, 13?

• Ano an epekto ha estudyante han video ngan mga teksto ha Biblia?

Damu an diri nakakasabot han lukat, o diri nira ito ginhuhunahuna sugad nga personal nga regalo ha ira han Dios. (Gal 2:20) Salit kinahanglan buligan naton hira nga parig-unon an ira pagtoo ha halad-lukat ni Jesus.

KITAA AN VIDEO NGA PARIG-ONA AN PAGTOO KAN JESUS, GAMIT AN “MABUHI HIN MALIPAYON HA WARAY KATAPOSAN!” NGAN BATONA AN MASUNOD:

• Kay ano nga makakasiring kita nga an brother nangandam hin maopay para ha ira pag-aram?

• Paonan-o niya gin-gamit an “Dugang nga Impormasyon” basi buligan an estudyante?

• Kay ano nga importante nga mag-ampo para ha estudyante?