An Teach Us * nga libro ngan an Igintututdo han Biblia nga libro magkapariho. Ini nga mga garamiton ha pagpanutdo nagpipresentar hin pariho nga mga kamatuoran ha pariho nga pagkasunod-sunod. Kondi ha Teach Us nga libro, simple an mga pulong ngan pangatadongan. Gindisenyo ini para hadton bangin nakukurian pagsabot ha Igintututdo han Biblia nga libro. An Teach Us nga libro waray apendise, lugod may mga endnote nga nagtatagana hin simple nga pagsaysay ha pipira nga termino ngan konsepto ha mga parapo. An mga kapitulo waray mga pakiana ha tinikangan o kahon para ha repaso. Lugod, ha kataposan han kapitulo may-ada sumaryo han mga kamatuoran ha Biblia nga ginhisgotan ha mga parapo. Pariho ha Igintututdo han Biblia nga libro, an Teach Us mahimo itanyag ha bisan san-o, bisan kon diri ito an tanyag durante han bulan. Paonan-o naton mahimo gamiton ini nga mga bahin han Teach Us nga libro ha pagdumara hin pag-aram ha Biblia?

SUMMARY: Para ha kadam-an, epektibo an aton nahiaraan nga paagi ha pagdumara hin pag-aram pinaagi ha pagbasa han parapo ha Igintututdo han Biblia nga libro ngan ha pagbangon han pakiana. Kondi kon an estudyante diri pamilyar han yinaknan o diri nakakabasa hin maopay, puydi mo gamiton an Teach Us nga libro. Katapos, an sumaryo han kapitulo mahimo gamiton sugad nga basihan han iyo pag-aram ngan mahimo aghaton an estudyante nga personal nga basahon an mga parapo. An tagsa nga kamatuoran kasagaran nga mahimo hisgotan ha sulod hin mga 15 minutos. Tungod kay an sumaryo waray han mga detalye nga mababasa ha parapo, sadang mag-andam hin maopay an magturutdo, nga ginhuhunahuna an ginkikinahanglan han estudyante. Kon mga parapo ha kapitulo an gagamiton ha pagdumara hin pag-aram, an mga sumaryo mahimo gamiton sugad nga repaso.

ENDNOTES: An mga termino ngan mga konsepto ha mga endnote nakahan-ay uyon ha pagkasunod-sunod hito ha mga parapo. An magwarali mahimo magdesisyon kon hihisgotan niya o diri an mga endnote ha Teach Us nga libro durante han pag-aram.