Diri na maiha, matatapos an pagpailob ni Jehova hini nga kalibotan. Bubungkagon an buwa nga relihiyon, aatakehon an katawohan han Dios hin usa nga alyansa han mga nasud, ngan pamamatayon ni Jehova an magraot ha Armagedon. Ginpapamulat gud han mga Kristiano inin importante ngan eksayting nga mga panhitabo.

Syempre, diri kita maaram han ngatanan nga detalye mahitungod ha daku nga kasakitan. Pananglitan, diri kita maaram kon san-o gud ito magtitikang. Diri kita maaram han mga rason nga gagamiton han politikal nga mga gahum basi pakamatadungon an ira pag-atake ha relihiyon. Diri kita maaram kon mationan-o kaiha an pag-atake han mga nasud ha katawohan han Dios o kon ano an mahiuupod hito. Diri liwat kita maaram han eksakto nga paagi nga gagamiton ni Jehova basi bungkagon an magraot ha Armagedon.

Pero an Kasuratan naghahatag ha aton han ngatanan nga impormasyon nga ginkikinahanglan naton basi maatubang nga may pagsarig ngan kaisog an mahitatabo ha tiarabot. Pananglitan, maaram kita nga nagkikinabuhi na kita ha ultimo nga bahin han “kataposan nga mga adlaw.” (2Ti 3:1) Maaram kita nga ‘pahahaliputon’ an pag-atake ha relihiyon basi diri mabungkag an tinuod nga relihiyon. (Mat 24:22) Maaram kita nga tatalwason ni Jehova an iya katawohan. (2Pe 2:9) Ngan maaram kita nga matadong ngan gamhanan an Usa nga ginpili ni Jehova basi pamatayon an magraot ngan talwason an daku nga grupo ha Armagedon.—Pah 19:11, 15, 16.

Kon makita han mga tawo an mahitatabo ha tiarabot, “madidismayo [hira] tungod han kahadlok.” Pero pinaagi han pagbasa ngan pagpamalandong ha mga ginbuhat ni Jehova nga pagtalwas ha naglabay ngan ha kon ano an iginsumat niya parte ha tiarabot, ‘makakatindog kita hin tadong ngan mahangad,’ nga nasarig nga an aton katalwasan hirani na.—Lu 21:26, 28.