Han nakanhi hi Jesus ha tuna, ginpabug-atan niya an sugo: “Pasidunggi an imo tatay ngan an imo nanay.” (Eks 20:12; Mat 15:4) Sigurado nga may kagawasan ha pagyakan hini hi Jesus kay “nagpasakop” hiya ha iya mga kag-anak sugad nga batan-on. (Lu 2:51) Sugad nga adulto, ginsiguro niya nga maaataman an iya nanay bisan kon mamatay na hiya.—Ju 19:26, 27.

Ha aton panahon liwat, an batan-on nga mga Kristiano nga nagpapasakop ngan matinalahuron nga nakikiistorya ha ira mga kag-anak nagpapasidungog ha ira kag-anak. Ngani, waray tubtoban an pag-aplikar han sugo nga pasidunggan an aton kag-anak. Bisan kon malagas na hira, kinahanglan padayon naton pasidunggan hira pinaagi ha pagpahimulos han ira kinaadman. (Pr 23:22) Ginpapasidunggan liwat naton an aton edaran na nga kag-anak pinaagi ha pagtagana han ira emosyonal ngan pinansyal nga panginahanglan. (1Ti 5:8) Bata man kita o edaran na, an pagtipig hin maopay nga komunikasyon ha aton kag-anak usa nga paagi ha pagpasidungog ha ira.

KITAA AN WHITEBOARD ANIMATION NGA PAONAN-O AKO MAKIKIISTORYA HA AKON MGA KAG-ANAK? NGAN BATONA INI:

• Kay ano nga bangin makurian ka pakiistorya ha imo mga kag-anak?

• Paonan-o mo mapapasidunggan an imo mga kag-anak kon nakikiistorya ka ha ira?

• Kay ano nga diri karag an imo pangalimbasog ha pakiistorya ha imo mga kag-anak? (Pr 15:22)