KON KAY ANO NGA IMPORTANTE: Kon “an sagdon ha kasingkasing han tawo pariho hin halarum nga tubig,” an mga pakiana pariho hin kabo nga makakabulig ha pagkuha hito nga tubig. (Pr 20:5) An mga pakiana nabulig ha aton mamarati nga makigbahin. An mga baton ha pinili hin maopay nga mga pakiana agsob nga naghahatag hin mapulsanon nga impormasyon. Hi Jesus naggamit hin epektibo nga mga pakiana. Paonan-o naton hiya masusubad?

KON PAONAN-O ITO BUBUHATON:

• Pagbangon hin punto de bista nga pakiana. Nagbangon hi Jesus hin sunod-sunod nga pakiana basi mahibaroan an panhunahuna han iya mga disipulo. (Mat 16:13-16; be 238 ¶4-6) Ano nga punto de bista nga mga pakiana an mahimo mo ibangon?

• Pagbangon hin mga pakiana nga magtutugway ha husto nga konklusyon. Basi tadungon an panhunahuna ni Pedro, nagbangon hi Jesus hin mga pakiana ngan nagtagana hin posible nga mga baton nga nakabulig kan Pedro nga magkaada husto nga panhunahuna. (Mat 17:24-26) Ano nga mga pakiana an puydi mo ibangon basi mabuligan an usa nga magkaada husto nga konklusyon?

• Kumendasyuni an imo kaistorya. Katapos maghatag an eskriba hin ‘husto gud nga baton,’ ginkumendasyonan hiya ni Jesus. (Mar 12:34) Paonan-o mo kukumendasyonan an usa nga naghatag hin baton ha pakiana?

KITAA AN SIYAHAN NGA BAHIN HAN VIDEO NGA BUHATA AN BURUHATON NGA GINHIMO NI JESUS—PAGTUTDO, NGAN BATONA INI:

• Kay ano nga ehemplo ini hin diri maopay nga pagtutdo, bisan kon husto an impormasyon nga iginpresenta?

• Kay ano nga labaw pa ha pagsaysay han impormasyon an aton sadang buhaton?

KITAA AN IKADUHA NGA BAHIN HAN VIDEO, NGAN BATONA INI:

• Paonan-o gumamit an bugto hin mga pakiana ha epektibo nga paagi?

• Ano an iba pa nga aspekto han iya pagtutdo an mahimo naton subaron?