KON KAY ANO NGA IMPORTANTE: An mga tawo kinahanglan tumawag ha ngaran ni Jehova basi matalwas. (Ro 10:13, 14) Pero diri ngatanan nga nag-aaram han Biblia andam magkinabuhi uyon ha mga suruklan ni Jehova. Ginagamit naton ha gimaopayi nga paagi ha ministeryo an aton presyoso nga panahon pinaagi ha pagbulig hadton naruruyag gud magbag-o basi lipayon hi Jehova. Kon an usa nga estudyante han Biblia diri nag-uuswag paglabay hin makatadunganon nga peryodo hin panahon, maaramon nga gamiton lugod naton an aton panahon ha mga interesado nga iginpapahirani ni Jehova ha iya ngan ha iya organisasyon. (Ju 6:44) Syempre, kon mapamatud-an ha urhi nga an indibiduwal “may husto nga disposisyon basi magkaada kinabuhi nga waray kataposan,” malilipay kita nga ipadayon an pag-aram.​—Bu 13:48.

KON PAONAN-O ITO BUBUHATON:

• Kumendasyuni an estudyante ha iya hingyap nga magkaada husto nga kahibaro.​—1Ti 2:4

• Pabug-ati an pagkaimportante ha pag-aplikar han iya hinbabaroan.​—Lu 6:46-49

• Mahigugmaon nga hisguti an ilustrasyon ni Jesus mahitungod han magsarabwag, ngan hangyoa hiya nga hunahunaon kon ano an bangin nakakapugong ha iya.​—Mat 13:18-23

• Matinalahuron nga isaysay kon kay ano nga iuundang mo an pagdumara hin pag-aram ha iya

• Pahibaroa hiya nga mabisita o matawag ka ha panapanahon basi dasigon hiya ngan sumati hiya nga puydi ipadayon an pag-aram kon andam na hiya maghimo hin mga pagbag-o

KITAA AN VIDEO, NGAN BATONA AN MASUNOD:

• Ha aton nakita, paonan-o mo hinbaroan nga diri nag-uuswag ha espirituwal an estudyante han Biblia?

• Paonan-o ginbuligan han magwarali nga makita han estudyante nga kinahanglan niya maghimo hin mga pagbag-o?

• Ano an ginhimo han magwarali basi masantop han estudyante nga puydi niya ipadayon an pag-aram?