Kon nakita ka hin bukad nga damu an kolor, kalangitan nga damu an bitoon, o daku nga busay, ginkikita mo ba ini sugad nga hinimo han Maglalarang? An mga linarang matin-aw nga nagpapahayag han diri nakikita nga mga kalidad ni Jehova. (Ro 1:20) Pinaagi ha pagpamalandong han mga butang nga aton nakikita, nagigin mas klaro ha aton an gahum, gugma, kinaadman, hustisya, ngan an pagin mahinatagon han Dios.​—Sal 104:24.

Ano an pipira han obra-maestra ni Jehova an nakikita mo kada adlaw? Bisan kon naukoy ka ha syudad, mahimo ka makakita hin katamsihan o mga puno. An pag-obserbar hin maopay ha mga linarang ni Jehova mahimo makabulig nga maibanan an aton kabaraka, diri maghinunahuna han aton problema, ngan maparig-on an aton pagtoo ha iya abilidad ha pag-ataman ha aton ha kadayonan. (Mat 6:25-32) Kon may-ada ka mga anak, buligi hira nga masantop an diri matupngan nga mga kalidad ni Jehova. Samtang naghihilarom an aton apresasyon ha mga linarang, nagigin mas duok kita ha Maglalarang.​—Sal 8:3, 4.

KITAA AN VIDEO NGA IGINPAPAKITA HAN MGA LINARANG AN HIMAYA HAN DIOS​—KAPAWA NGAN KOLOR, NGAN BATONA AN MASUNOD:

• Paonan-o an mga pigment nabulig nga makita naton an mga kolor?

• Ano an hinungdan ha pagkaada hin iridescence?

• Kay ano nga nakita kita hin iba-iba nga kolor ha kalangitan?

• Ano nga malamrag nga mga kolor an nakikita mo ha mga linarang ha imo palibot?

• Kay ano nga sadang kita maggahin hin panahon basi obserbaran hin maopay an mga linarang?