USA ini nga libro han tinuod nga mga istorya. Iginbasar ini nga mga istorya ha pinakabantogan nga libro ha kalibotan, an Biblia. Iginsusumat hini an kasaysayan han kalibotan tikang han paglarang han Dios tubtob ha aton panahon. Iginsusumat liwat hini an iginsaad nga pagbubuhaton han Dios ha tidaraon.

Ini nga libro naghihisgot kon ano an sulod han Biblia. Nagsusumat ini han mga tawohan ha Biblia ngan han ira mga ginbuhat. Ipinapakita liwat hini an urusahon nga paglaom nga kinabuhi nga waray kataposan ha paraiso nga tuna nga iginhatag han Dios ha katawohan.

May-ada 116 nga istorya ini nga libro. Gin-grupo ini ha walo nga bahin. An pahina ha tinikangan han tagsa nga bahin nagsusumaryo kon ano an paghihisgotan dida hito. An mga istorya ginsunod-sunod uyon ha panhitabo ha kasaysayan. Mabulig ini ha imo nga hibaroan kon kakan-o nahitabo ito ha kasaysayan, kon itanding ha iba nga panhitabo.

Hini nga mga istorya, simple nga mga pulong an gin-gamit. Damu ha iyo nga kabataan an makakabasa mismo hini. Maoobserbahan niyo nga mga kag-anak nga maruruyag an iyo gudtiay nga mga anak nga pauroutro nga basahon niyo ini ha ira. Makikita niyo nga ini nga libro maruruyagan gud han mga batan-on ngan adulto.

Makikita ha kataposan han tagsa nga istorya an mga teksto kon diin ini iginbasar ha Biblia. Gin-aaghat ka nga basahon ini nga mga teksto ha Biblia nga ginbasaran hini nga mga istorya. Kon makatapos ka hin usa nga istorya, kitaa liwat an mga pakiana mahitungod hito nga istorya nga makikita katapos han Istorya 116 ngan batona an mga pakiana.