Diri la iginsusumat han Biblia an tinuod nga mga istorya nga nahitabo ha naglabay kondi iginsusumat liwat hito kon ano an mahitatabo ha tidaraon. An mga tawo diri nakakagtagna han tidaraon. Salit maaram kita nga an Biblia tikang ha Dios. Ano an ginsisiring han Biblia mahitungod han tidaraon?

Nagsusumat ito mahitungod han daku nga girra han Dios. Hito nga girra, wawad-on han Dios an ngatanan nga karaotan ha tuna ngan bubungkagon an magraot nga tawo, kondi iya pananalipdan adton nag-aalagad ha iya. Sisiguruhon han hadi han Dios nga hi Jesu-Kristo nga magkakaada hin kamurayawan ngan kalipay an mga surugoon han Dios, ngan diri na gud hira magkakasakit o mamamatay.

Nalilipay gud kita nga an Dios maghihimo hin bag-o nga paraiso ha tuna, diri ba? Kondi kinahanglan may-ada kita buhaton kon karuyag naton umukoy hito nga paraiso. Ha kataposan nga istorya hini nga libro, mahibabaroan naton kon ano an kinahanglan naton buhaton basi magpahimulos han urusahon nga mga butang nga igin-andam han Dios para hadton nag-aalagad ha iya. Salit basaha an BAHIN 8 ngan hibarui kon ano an igintatagna han Biblia para ha tidaraon.