ANO an imo nakikita dinhi? Oo, mga sundalo nga sakay ha busag nga mga kabayo. Kondi kitaa kon diin hira tikang. An mga kabayo nagdadadlagan tipaubos ha mga dampog tikang ha langit! May-ada gud ba mga kabayo ha langit?

Waray. Diri ito tinuod nga mga kabayo. Diri makakadalagan an mga kabayo ha mga dampog, diri ba? Kondi, an Biblia nag-uunabi han mga kabayo ha langit. Maaram ka ba kon kay ano?

Tungod kay hadto, agsob gamiton ha girra an mga kabayo. Salit an Biblia nag-uunabi hin mga persona nga nasakay ha mga kabayo tikang ha langit basi ipakita nga an Dios makikiggirra ha mga tawo dinhi ha tuna. Maaram ka ba kon ano an ngaran hini nga girra? Armagedon. Bubungkagon hini nga girra an ngatanan nga karaotan dinhi ha tuna.

Hi Jesus an mangunguna ha pakig-away hini nga girra ha Armagedon. Hinumdumi nga hi Jesus an ginpili ni Jehova nga magin hadi ha Iya gobyerno. Salit, nakasul-ot hi Jesus hin korona han usa nga hadi. Ngan an espada nagpapasabot nga papatayon niya an ngatanan nga kaaway han Dios. Sadang ba kita mahipausa nga bubungkagon han Dios an ngatanan nga magraot nga tawo?

Kitaa utro an Istorya 10. Ano an imo nakikita? Oo, an daku nga Baha nga nagbungkag han magraot nga tawo. Hin-o an nagpahinabo hito? Hi Jehova nga Dios. Katapos, kitaa an Istorya 15. Ano an nahitatabo didto? Ginbubungkag an Sodoma ngan Gomorra pinaagi han kalayo tikang kan Jehova.

Kitaa an Istorya 33. Ano an nahitatabo ha mga kabayo ngan karomata han mga Ehiptohanon? Hin-o an nagpahinabo nga magkalulumos hira? Hi Jehova. Ginbuhat niya ito basi panalipdan an iya katawohan. Kitaa an Istorya 76. Makikita mo nga gintugotan pa ngani ni Jehova nga mabungkag an mga Israelita nga iya katawohan tungod han ira karaotan.

Salit diri kita sadang mahipausa nga susugoon ni Jehova an iya langitnon nga kasundalohan basi wad-on an ngatanan nga karaotan ha tuna. Kondi hunahunaa kon ano an magigin kahulogan hito! Kitaa an sunod nga pahina.