MAARAM ka ba kon ano an ginbabasa han gutiay nga bata ngan han iya kasangkayan? Oo, an libro nga imo ginbabasa—An Akon Libro han mga Istorya ha Biblia. Ngan ira ginbabasa an istorya nga imo ginbabasa yana—“Kon Paonan-o Kita Mabubuhi ha Waray Kataposan.”

Maaram ka ba kon ano an kinahanglan naton hibaroan? Siyahan, kinahanglan mahibaro kita mahitungod kan Jehova ngan ha iya Anak nga hi Jesus kon karuyag naton mabuhi ha waray kataposan. An Biblia nasiring: ‘Ini an paagi basi mabuhi ha waray kataposan. Pag-aram mahitungod ha amo la nga matuod nga Dios, ngan ha Anak nga iya ginpakanhi ha tuna, hi Jesu-Kristo.’

Paonan-o kita mahibabaro mahitungod kan Jehova nga Dios ngan ha iya Anak nga hi Jesus? Usa nga paagi amo an pagbasa han An Akon Libro han mga Istorya ha Biblia tikang ha tinikangan tubtob ha kataposan. Damu an iginsusumat hini mahitungod kan Jehova ngan kan Jesus. Ngan damu an iginsusumat hini mahitungod han ira mga ginbuhat ngan han ira pagbubuhaton pa. Kondi diri la pagbasa hini nga libro an kinahanglan naton buhaton.

Nakikita mo ba an usa pa nga libro ha salog? Ito an Biblia. Paghangyo hin magbabasa ha imo han bahin han Biblia diin iginbasar an mga istorya hini nga libro. Iginsusumat ha aton han Biblia an bug-os nga impormasyon nga ginkikinahanglan naton basi makag-alagad kita ngatanan kan Jehova ha husto nga paagi ngan mabuhi nga waray kataposan. Salit, kinahanglan batasanon naton nga pag-adman pirme an Biblia.

Kondi diri igo an paghibaro la mahitungod kan Jehova nga Dios ngan kan Jesu-Kristo. Mahimo kita mahibaro hin damu gud mahitungod ha ira ngan ha ira mga katutdoan, kondi diri makarawat han kinabuhi nga waray kataposan. Maaram ka ba kon ano pa an ginkikinahanglan?

Kinahanglan liwat nga buhaton naton an aton hinbabaroan. Nahinunumdoman mo ba hi Judas Iskariote? Usa hiya han 12 nga ginpili ni Jesus nga magin iya apostol. Damu an hinbaroan ni Judas mahitungod kan Jehova ngan kan Jesus. Kondi ano an nahitabo ha iya? Waray pag-iha nagin hakog hiya, ngan igintubyan hi Jesus ha iya mga kaaway para ha 30 ka bug-os nga salapi. Salit, hi Judas diri makarawat han kinabuhi nga waray kataposan.

Nahinunumdoman mo ba hi Gehasi, an lalaki nga aton ginhisgotan ha Istorya 69? Karuyag niya nga magkaada hin mga bado ngan kwarta nga diri iya. Salit nagbuwa hiya basi makuha ito. Tungod hito, ginsirotan hiya ni Jehova. Ngan sisirotan liwat kita ni Jehova kon diri naton sundon an iya mga balaud.

Kondi, damu an mag-opay nga tawo nga matinumanon pirme nga nag-aalagad kan Jehova. Karuyag naton magin pariho ha ira. Maopay nga susbaranan an bata nga hi Samuel. Hinumdumi nga mga upat o lima ka tuig pa la hiya han nagtikang hiya ha pag-alagad kan Jehova ha Iya tabernakulo, sumala han aton ginbasa ha Istorya 55. Salit, bisan kon gutiay ka pa, puydi ka mag-alagad kan Jehova.

Syempre, hi Jesu-Kristo an karuyag gud naton subaron. Bisan kon bata pa hiya, sugad han ipinakita ha Istorya 87, kinadto hiya ha templo basi makiistorya ha iba mahitungod han iya Amay ha langit. Subaron naton hiya. Aton sumatan an mga tawo mahitungod han aton harangdon nga Dios nga hi Jehova ngan han iya Anak, hi Jesu-Kristo. Kon buhaton naton ini, mabubuhi kita ha waray kataposan ha bag-o nga paraiso han Dios dinhi ha tuna.