HAROS duha ka tuig na tikang han ginsakop han mga Mediahanon ngan Persiahanon an Babilonya. Kitaa kon ano an nahitatabo yana! Oo, nabaya na ha Babilonya an mga Israelita. Kay ano nga nakagawas hira tikang ha pagin bihag? Hin-o an nagpagawas ha ira?

An hadi han Persia nga hi Ciro an nagpagawas ha ira. Maiha pa antes ig-anak hi Ciro, ginsugo ni Jehova hi propeta Isaias nga magsurat mahitungod ha iya: ‘Bubuhaton mo an ipapabuhat ko ha imo. Mapapabay-an nga abrido an mga ganghaan basi masakop mo an syudad.’ Ngan hi Ciro gud an nanguna ha pagsakop ha Babilonya. Sinulod an mga Mediahanon ngan Persiahanon hito nga gab-i ha mga ganghaan nga ginpabay-an nga abrido.

Kondi nagsiring liwat an propeta ni Jehova nga hi Isaias nga magsusugo hi Ciro nga tukuron utro an Jerusalem ngan an templo hito. Iginsugo ba ini ni Ciro? Oo. Ini an ginsiring niya ha mga Israelita: ‘Pakadto na kamo ha Jerusalem ngan tukora an templo ni Jehova nga iyo Dios.’ Ngan ito an bubuhaton hinin nabaya nga mga Israelita.

Kondi diri ngatanan nga Israelita makakabyahe hin hirayo pabalik ha Jerusalem. An kahirayo han ira bibyahion mga 800 ka kilometro, salit diri na makakaupod an damu nga lagas ngan magsakiton. Ngan may-ada pa iba nga hinungdan kon kay ano nga diri mauli an iba. Kondi nagsiring hi Ciro ha mga diri mauli: ‘Hatagi hin salapi ngan bulawan ngan iba nga regalo an katawohan nga mangunguli basi tukuron an Jerusalem ngan an templo hito.’

Salit, damu nga regalo an iginhatag ha mga Israelita nga tikadto ha Jerusalem. Iginhatag liwat ha ira ni Ciro an mga yahong ngan mga kopa nga ginkuha ni Hadi Nabukodonosor ha templo ni Jehova han ginbungkag niya an Jerusalem. Tungod hito, damu an ira dara tipauli.

Katapos han haros upat ka bulan nga pagbyahe, inabot ha Jerusalem an mga Israelita ha husto nga panahon. Mga 70 ka tuig na tikang nga nabungkag an syudad ngan waray nag-ukoy ha bug-os nga tuna. Kondi bisan kon nakabalik na an mga Israelita ha ira kalugaringon nga nasud, magkakaada la gihapon hira hin mga problema, sugad han aton hibabaroan ha masunod nga istorya.