BALIK kita hin pipira ka tuig antes kumadto hi Esra ha Jerusalem. Hira Mordekay ngan Ester an pinakaprominente nga mga Israelita ha ginhadian han Persia. Hi Ester an rayna, ngan an iya patod nga hi Mordekay an ikaduha ha hadi. Aton usisahon kon paonan-o ini nahitabo.

Namatay an mga kag-anak ni Ester han bata pa hiya, salit hi Mordekay an nagpadaku ha iya. An hadi han Persia nga hi Ahasuerus may-ada palasyo ha syudad han Susan, ngan hi Mordekay usa han iya mga surugoon. Usa ka adlaw, waray sumugot ha hadi an iya asawa nga hi Basti, salit nagpili hiya hin bag-o nga asawa basi magin iya rayna. Maaram ka ba kon hin-o an iya ginpili? Oo, an mahusay nga batan-on nga hi Ester.

Nakikita mo ba ini nga hambog nga lalaki nga ginyuyukboan han mga tawo? Hiya hi Haman. Prominente gud hiya ha Persia. Karuyag niya nga yumukbo liwat ha iya ini nga tawo nga nalingkod nga amo hi Mordekay. Kondi nadiri hi Mordekay ha pagyukbo. Para ha iya, sayop an pagyukbo ngada hinin maraot nga tawo. Tungod hini nasina gud hi Haman. Salit ini an iya ginbuhat.

Ginsumatan ni Haman an hadi hin mga buwa mahitungod ha mga Israelita. ‘Magraot hira nga tawo nga diri nasunod ha imo mga balaud. Angay hira pamatayon,’ siring niya. Diri maaram hi Ahasuerus nga Israelita an iya asawa nga hi Ester. Salit namati hi Ahasuerus kan Haman, ngan naghimo hiya hin balaud nga nagpili hin adlaw nga an ngatanan nga Israelita pamamatayon.

Han hinbaroan ni Mordekay ito nga balaud, nasubo gud hiya. Nagpadara hiya hin mensahe kan Ester: ‘Kinahanglan sumatan mo an hadi, ngan manginyupo ka nga talwason kita.’ Igindidiri han balaud han Persia an pagkadto ha hadi kon diri ka ginpapakadto. Kondi kinadto hi Ester bisan kon waray hiya pakadtoa. Igin-unat han hadi an iya bulawan nga setro ngadto kan Ester, nga nagpapasabot nga diri hiya papatayon. Gin-imbitar ni Ester an hadi ngan hi Haman ha usa nga pangaon. Didto, nagpakiana an hadi kan Ester kon ano an iya karuyag hangyoon. Nagsiring hi Ester nga isusumat niya ito kon kumada hira utro ha usa pa nga panagtawo kinabuwasan.

Hito nga pangaon ginsumatan ni Ester an hadi: ‘Ako ngan an akon katawohan pamamatayon.’ Nasina an hadi. ‘Hin-o an nangahas ha pagbuhat hito?’ nagpakiana hiya.

‘Ito nga kaaway nga tawo amo inin maraot nga hi Haman!’ siring ni Ester.

Nasina gud an hadi salit nagsugo hiya nga patayon hi Haman. Katapos, ginpili han hadi hi Mordekay nga ikaduha ha iya. Ginsiguro ni Mordekay nga magkaada hin bag-o nga balaud nga nagtutugot ha mga Israelita nga depensahan an ira kalugaringon ha adlaw nga pamamatayon hira. Tungod kay hitaas na yana an katungdanan ni Mordekay, damu nga tawo an binulig ha mga Israelita, ngan natalwas hira tikang ha ira mga kaaway.