Yinukot nga tawo an nagbyahe hin hirayo tikang ha Babilonya ngadto ha Jerusalem. Kondi pag-abot nira, guba gud an Jerusalem. Waray naukoy didto. Kinahanglan tukuron utro an ngatanan.

Usa han siyahan nga ira gintukod amo an altar. Dida hira naghahalad hin mga hayop ngadto kan Jehova. Paglabay hin pipira ka bulan, gintikangan nira an pagtukod han templo. Kondi diri karuyag han mga kaaway nga naukoy ha ira hirani nga buhaton nira ito. Salit gintarhog hira basi umundang ha pagtukod. Ngan gin-aghat hini nga mga kaaway an bag-o nga hadi han Persia nga maghimo hin balaud ha pagpaundang hito.

Linabay an mga tuig. Ngan yana, 17 ka tuig na hira ha Jerusalem tikang ha ira pagbaya ha Babilonya. Ginsugo ni Jehova hira propeta Hagay ngan Sakarias nga sumatan an katawohan nga ipadayon an pagtukod. Sinarig hira ha bulig han Dios, ngan ginsunod nira an mga propeta. Iginpadayon nira an pagtukod, bisan kon igindidiri ito han balaud.

Salit hi Tatenay nga opisyal han Persia kinadto ngan nagpakiana kon hin-o an nagtugot ha ira nga tukuron an templo. Ginsidngan hiya han mga Israelita nga han nakadto pa hira ha Babilonya, ginsugo hira ni Hadi Ciro: ‘Pakadto na kamo ha Jerusalem ngan tukora an templo ni Jehova nga iyo Dios.’

Nagsurat hi Tatenay ngadto ha Babilonya ngan nagpakiana kon iginsugo gud ba ito ni Ciro, nga patay na hito nga panahon. Waray pag-iha binalos an bag-o nga hadi han Persia. Nasiring ito nga iginsugo gud ito ni Ciro. Ngan nasiring pa ito: ‘Tuguti an mga Israelita nga tukuron an templo han ira Dios. Ngan ginsusugo ko ikaw nga buligan hira.’ Ha sulod la hin mga upat ka tuig, nahuman an templo, ngan nalipay gud an mga Israelita.

Linabay an damu pa ka tuig, ngan yana haros 48 ka tuig na tikang nga natapos an templo. Pobre an katawohan ha Jerusalem, ngan an syudad ngan an templo han Dios diri maopay pagkit-on. Ha Babilonya, hinbaroan han Israelita nga hi Esra nga kinahanglan opayon an templo han Dios. Maaram ka ba kon ano an iya ginbuhat?

Nakigkita hi Esra kan Artaherhes, an hadi han Persia. Gintagan hiya hini nga buotan nga hadi hin damu nga regalo basi dad-on ha Jerusalem. Naghangyo hi Esra ha mga Israelita ha Babilonya nga buligan hiya ha pagdara han mga regalo ngadto ha Jerusalem. Mga 6,000 nga tawo an nagsiring nga maupod hira. Damu an ira dara nga salapi ngan bulawan ngan iba pa nga birilhon nga butang.

Nababaraka hi Esra tungod kay damu an magraot nga tawo ha ira aagian. Bangin kuhaon hini nga mga tawo an ira salapi ngan bulawan ngan pamatayon hira. Salit gintirok niya an iya mga kaupod, sugad han imo nakikita ha retrato. Nag-ampo hira kan Jehova nga panalipdan hira ha ira pagbyahe ngadto ha Jerusalem.

Ginpanalipdan gud hira ni Jehova. Ngan katapos hin upat ka bulan nga pagbyahe, nakaabot hira nga talwas ha Jerusalem. Iginpapakita hini nga ginpapanalipdan ni Jehova an mga nangangaro ha iya hin bulig, diri ba?