NAHINUNUMDOMAN mo ba ini nga tulo nga batan-on? Oo, hira an kasangkayan ni Daniel nga nagdumiri ha pagkaon han diri makakaopay ha ira. Gintawag hira han mga Babilonyahanon nga Sadrak, Mesak ngan Abednego. Kondi kitaa hira yana. Kay ano nga diri hira nayukbo ha daku nga imahen pariho han ginbubuhat han iba? Aton kitaon kon kay ano.

Nahinunumdoman mo ba an mga balaud nga iginsurat mismo ni Jehova nga tinatawag nga Napulo nga Sugo? An siyahan amo ini: ‘Diri ka magsingba ha lain nga mga dios gawas ha akon.’ Ginsusunod hinin tulo nga batan-on ini nga sugo, bisan kon makuri an pagbuhat hito.

Iginpatawag han hadi han Babilonya nga hi Nabukodonosor an damu nga dungganon nga tawo basi singbahon ini nga imahen nga iya gintukod. Nagsiring pa la hiya ha ngatanan: ‘Kon mabatian niyo an tunog han korneta, arpa ngan iba pa nga instrumento ha musika, kinahanglan magyukbo ngan magsingba kamo hini nga bulawan nga imahen. An bisan hin-o nga diri yumukbo ngan magsingba ilalabog dayon ha naglalaga nga hudno.’

Han hinbaroan ni Nabukodonosor nga hira Sadrak, Mesak ngan Abednego waray yumukbo, nasina gud hiya. Iginpatawag niya hira. Gintagan niya hira hin usa pa nga higayon nga yumukbo. Kondi an mga batan-on nasarig kan Jehova. ‘An Dios nga amon gin-aalagaran makakagluwas ha amon,’ siring nira kan Nabukodonosor. ‘Kondi bisan kon diri kami niya luwason, diri kami mayukbo ha imo bulawan nga imahen.’

Han pakabati hini, dinugang an kasina ni Nabukodonosor. May-ada hirani nga hudno ngan nagsugo hiya: ‘Pasoa an hudno hin pito ka pilo kay ha kasagaran!’ Katapos, iginpagapos niya hira Sadrak, Mesak ngan Abednego ha iya pinakamakusog nga kasundalohan ngan iginpalabog hira ha hudno. Mapaso hinduro ito salit an magkusog nga kasundalohan namatay tungod han kalayo. Kondi kumusta man an tulo nga batan-on nga ira iginlabog?

Ginkita han hadi an hudno, ngan nahadlok gud hiya. ‘Diri ba tulo nga batan-on an aton gin-gapos ngan iginlabog ha naglalaga nga hudno?’ nagpakiana hiya.

‘Oo,’ binaton an iya mga surugoon.

‘Kondi upat nga lalaki an akon nakikita nga naglilinakat-lakat ha kalayo,’ siring niya. ‘Waray hira mga gapos, ngan diri hira nasusunog. Ngan an ikaupat baga hin dios.’ Hinirani an hadi ha purtahan han hudno ngan nagsinggit: ‘Sadrak! Mesak! Abednego! Gawas kamo ngadi, kamo nga mga surugoon han Gihitaasi nga Dios!’

Han ginawas hira, nakita han ngatanan nga waray hira kasunog. Katapos an hadi nagsiring: ‘Dayawon unta an Dios nira Sadrak, Mesak ngan Abednego! Ginsugo niya an iya anghel ngan ginluwas hira tungod kay diri hira nayukbo ngan nasingba ha bisan ano nga dios gawas ha iya.’

Diri ba maopay ini nga susbaranan han pagin matinumanon kan Jehova nga angay naton subaron?