DUHA ka tuig na an naglabay, priso la gihapon hi Jose. Waray hiya mahinumdumi han paratagay. Kondi usa ka gab-i, nagkaada hin duha nga urusahon nga inop hi Paraon, ngan diri hiya maaram kon ano an kahulogan hito. Nakikita mo ba hiya nga nakaturog? Kinabuwasan ginpatawag ni Paraon an iya maaramon nga kalalakin-an ngan iginsumat ha ira an iya inop. Kondi waray nira maisaysay an kahulogan hito.

Hito nga panahon nahinumdoman han paratagay hi Jose. Nagsiring hiya kan Paraon: ‘Han priso ako, may-ada usa nga lalaki didto nga nakakagsaysay han kahulogan han mga inop.’ Tungod hito, ginpagawas dayon ni Paraon ha prisohan hi Jose.

Iginsumat ni Paraon an iya mga inop kan Jose: ‘Nakakita ako hin pito nga baka nga magtambok ngan magpakaruruyag. Katapos, nakakita ako hin pito nga maggasa gud nga baka. Ngan ginkaon han maggasa nga baka an magtambok.

‘Ha akon ikaduha nga inop, nakakita ako hin pito nga uhay han hinog nga lugas nga tinubo ha usa nga lawas. Katapos nakakita ako hin pito nga uhay nga uga ngan maggasa. Ngan pinanlamoy han maggasa nga uhay an pito nga mag-opay.’

Hi Jose nagsiring kan Paraon: ‘Pariho an kahulogan han duha nga inop. An pito nga magtambok nga baka ngan an pito nga mag-opay nga uhay nangangahulogan hin pito ka tuig, ngan an pito nga maggasa nga baka ngan an pito nga uga nga uhay nangangahulogan hin pito pa ka tuig. Magkakaada hin pito ka tuig nga kahuraan ha Ehipto. Katapos, magkakaada hin pito ka tuig nga kagutom.’

Salit hi Jose nagsiring kan Paraon: ‘Pagpili hin maaramon nga lalaki nga magdudumara ha pagtirok han pagkaon durante han pito ka tuig nga kahuraan basi an mga tawo diri magutom durante han masunod nga pito ka tuig nga kagutom.’

Naruyagan ni Paraon an ideya. Ngan iya ginpili hi Jose ha pagdumara han pagtirok han pagkaon, ngan pagtipig hito. Hi Jose an sunod kan Paraon nga pinakadungganon nga tawo ha Ehipto.

Paglabay hin walo ka tuig, durante han kagutom, nakita ni Jose nga may-ada tiarabot nga kalalakin-an. Maaram ka ba kon hin-o hira? Amo hira an iya 10 nga magurang nga kabugtoan! Ginpakadto hira ha Ehipto han ira tatay nga hi Jakob tungod kay mauubosan na hira hin pagkaon ha Kanaan. Nakilala ni Jose an iya kabugtoan, kondi waray nira makilala hiya. Maaram ka ba kon kay ano? Tungod kay daku na hi Jose, ngan iba na an iya pamado.

Nahinumdoman ni Jose nga han bata pa hiya nag-inop hiya nga an iya kabugtoan nayukbo ha iya. Nahinunumdoman mo ba liwat ito? Salit nasantop ni Jose nga an Dios an nagpadara ha iya ngadto ha Ehipto, ngan para ha maopay nga katuyoan. Ha hunahuna mo, ano an ginbuhat ni Jose? Aton kitaon.