KITAA ini nga daku nga pamilya. Hira an 12 nga anak nga lalaki ni Jakob. Ngan may-ada liwat hiya mga anak nga babaye. Maaram ka ba han mga ngaran han iya iba nga anak? Kilalahon naton an iba ha ira.

Mga anak ni Lea hira Ruben, Simeon, Lebi ngan Juda. Han diri nagkakaanak hi Rakel, nasubo gud hiya. Salit, iya iginhatag kan Jakob an iya surugoon nga babaye nga hi Bilha, ngan igin-anak ni Bilha hira Dan ngan Neptali. Katapos, iginhatag liwat ni Lea kan Jakob an iya surugoon nga babaye nga hi Silpa, ngan igin-anak ni Silpa hira Gad ngan Aser. Nag-anak utro hi Lea hin duha nga lalaki nga hira Isakar ngan Sebulon.

Inabot an panahon nga nanganak gihapon hi Rakel. Iya ginngaranan an bata hin Jose. Damu pa an aton mahibabaroan mahitungod kan Jose tungod kay nagin bantogan hiya. Ini an 11 nga anak ni Jakob han nag-ukoy hiya ha tatay ni Rakel nga hi Laban.

May-ada liwat mga anak nga babaye hi Jakob, kondi ha Biblia, usa la ha ira an ginngaranan. Hiya hi Dina.

Inabot an panahon nga nagdesisyon hi Jakob nga bumaya kan Laban ngan bumalik ha Kanaan. Salit iya gintirok an iya daku nga pamilya ngan an iya kakarnerohan ngan kabakahan, ngan nagbyahe hira.

Han maiha-iha na nga nakabalik hi Jakob ngan an iya pamilya ha Kanaan, nanganak hi Rakel hin usa pa nga lalaki. Nahitabo ito han nagbibyahe hira. Nakurian hi Rakel ha panganak, salit namatay hiya. Kondi buhi ngan mahimsog an bata. Ginngaranan ni Jakob ito nga bata hin Benjamin.

Sadang hinumdoman naton an mga ngaran han 12 nga anak nga lalaki ni Jakob tungod kay tikang ha ira an bug-os nga nasud han Israel. Oo, an mga ngaran han 10 nga anak ni Jakob ngan 2 nga anak ni Jose an iginngaran ha 12 nga tribo han Israel. Nag-iha pa an kinabuhi ni Isaak katapos matawo ini ngatanan nga kalalakin-an, ngan sigurado nga nalipay hiya tungod kay damu an iya apo. Kondi kitaon naton kon ano an nahitabo ha iya apo nga hi Dina.