NAKIKITA mo ba an ginbubuhat ni Abraham dinhi? May-ada hiya kutsilyo, ngan baga hin papatayon niya an iya anak. Kay ano? Antes naton ito batunon, aton anay paghisgotan kon paonan-o nagkaanak hira Abraham ngan Sara.

Hinumdumi nga nagsaad an Dios kanda Abraham ngan Sara nga magkakaanak hira. Kondi baga hin imposible ito tungod kay lagas na gud hira. Pero, natoo hi Abraham nga waray imposible ha Dios. Salit ano an nahitabo?

Tikang han pagsaad han Dios, usa pa ka tuig an naglabay. Katapos, han 100 anyos hi Abraham ngan 90 anyos hi Sara, nagkaanak hira hin lalaki nga ginngaranan nga Isaak. Gintuman gud han Dios an iya saad!

Kondi han daku na hi Isaak, ginsarihan ni Jehova an pagtoo ni Abraham. Hiya nagtawag: ‘Abraham!’ Ngan hi Abraham binaton: ‘Iini ako!’ Ngan an Dios nagsiring: ‘Kuhaa an imo anak, an imo bugtong nga anak nga hi Isaak, ngan kadto ha bukid nga akon ipapakita ha imo. Didto, pataya hiya ngan ighalad hiya.’

Nasubo gud hito hi Abraham tungod kay hinigugma niya an iya anak. Ngan hinumdumi nga an Dios nagsaad nga an mga anak ni Abraham maukoy ha tuna han Kanaan. Kondi paonan-o ito mahitatabo kon mamamatay hi Isaak? Waray ito masabti ni Abraham, kondi ginsugot la gihapon niya an Dios.

Han inabot hira ha bukid, gin-gapos ni Abraham hi Isaak ngan iginbutang ha halaran nga iya ginhimo. Katapos, ginkuha ni Abraham an kutsilyo basi patayon an iya anak. Kondi han papatayon na niya hi Isaak, sininggit an anghel han Dios: ‘Abraham, Abraham!’ Ngan hi Abraham binaton: ‘Iini ako!’

‘Ayaw pagsamari an bata ngan ayaw hiya pagbuhati hin bisan ano,’ siring han Dios. ‘Yana maaram na ako nga natoo ka ha akon tungod kay waray ka magdumiri ha paghatag ha akon han imo anak, an imo uusa la nga anak.’

Daku gud an pagtoo ni Abraham ha Dios! Natoo hiya nga waray imposible kan Jehova, ngan mahimo pa ngani Niya banhawon hi Isaak. Kondi diri gud kaburut-on han Dios nga patayon ni Abraham hi Isaak. Salit ginpahinabo han Dios nga may-ada karnero nga maipit ha sanga han hirani nga kahoy-kahoy, ngan iya ginsidngan hi Abraham nga ito an ighalad, imbes nga an iya anak.