HI Lot ngan an iya pamilya kaupod ni Abraham ha pag-ukoy ha Kanaan. Usa ka adlaw, hi Abraham nagsiring kan Lot: ‘An tuna diri na igo para ha aton mga hayop. Pagbulag kita, nanginginyupo ako. Kon mapakadto ka ha too, mapawala ako.’

Ginkita ni Lot an lugar. Nakita niya an maopay gud nga bahin han tuna nga may-ada tubig ngan marabong nga kabanwaan para ha iya mga hayop. Ini an Distrito han Jordan. Salit binalhin hi Lot ngadto upod an iya pamilya ngan mga hayop. Paglabay han panahon, didto na hira umukoy ha syudad han Sodoma.

Magraot gud an mga tawo ha Sodoma. Nasubo gud hini hi Lot tungod kay maopay hiya nga tawo. Nasubo liwat an Dios. Inabot an panahon, ginsugo han Dios an duha nga anghel basi pahamangnoan hi Lot nga bubungkagon niya an Sodoma ngan an kahirani nga syudad nga amo an Gomorra tungod han karaotan hito.

An mga anghel nagsiring kan Lot: ‘Pagdagmit! Gawas dinhi upod an imo asawa ngan duha nga anak!’ Naghinay-hinay hi Lot ngan an iya pamilya ha paggawas, salit ginkaptan hira han mga anghel ngan ginpalaksi paggawas ha syudad. Katapos, an usa nga anghel nagsiring: ‘Palagiw kamo basi matalwas! Ayaw paglingi. Palagiw ngadto ha kabukiran basi diri kamo mamatay.’

Sinugot hi Lot ngan an iya mga anak ngan pinalagiw hira ha Sodoma. Waray hira umundang bisan madaliay, ngan waray hira lumingi. Kondi waray sumugot an asawa ni Lot. Han hurohirayo na hira ha Sodoma, inundang hiya ngan liningi. Salit nagin harigi hiya nga asin. Nakikita mo ba hiya ha retrato?

Mahibabaro kita hin maopay nga leksyon tikang hini. Ipinapakita hini nga gintatalwas han Dios adton nasugot ha iya, kondi adton diri nasugot ha iya, mamamatay.