KILALA mo ba kon hin-o ini nga babaye dinhi hini nga retrato? Rebeka an iya ngaran. Ngan an lalaki nga gindadaop niya amo hi Isaak, nga magigin bana niya. Paonan-o ini nahitabo?

Karuyag han tatay ni Isaak nga hi Abraham nga kumuha hin maopay nga asawa para ha iya anak. Diri niya karuyag nga makaasawa hi Isaak hin babaye nga taga-Kanaan tungod kay nagsisingba hira ha palso nga mga dios. Salit gintawag ni Abraham an iya surugoon ngan nagsiring: ‘Pakadto ha akon mga paryente ha Haran ngan pagkuha didto hin magigin asawa han akon anak nga hi Isaak.’

Kinuha dayon an surugoon ni Abraham hin napulo nga kamelyo ngan nagbyahe hiya hin hirayo. Han hirani na hiya ha lugar han mga paryente ni Abraham, inundang hiya ha usa nga atabay. Kulop na adto, ngan oras na han pag-alog ha atabay han kababayin-an hito nga syudad. Salit an surugoon ni Abraham nag-ampo kan Jehova: ‘Hinaot an babaye nga mag-alog para ha akon ngan ha mga kamelyo amo an imo ginpili nga magin asawa ni Isaak.’

Waray pag-iha inabot hi Rebeka basi umalog. Han naghangyo an surugoon hin maiinom, gintagan hiya ni Rebeka. Katapos, ginpainom ni Rebeka an ngatanan nga nauuhaw nga kamelyo. Makapoy adto nga trabaho tungod kay damu gud nga tubig an iniinom han kamelyo.

Han natapos hi Rebeka, ginpakianhan hiya han surugoon ni Abraham kon ano an ngaran han iya tatay. Nagpakiana liwat an surugoon kon puydi hiya makahigda hin usa ka gab-i ha ira balay. Hi Rebeka binaton: ‘Hi Betuel an akon tatay, ngan may-ada kami lugar para ha imo.’ Maaram an surugoon ni Abraham nga hi Betuel anak han bugto ni Abraham nga hi Nahor. Salit linuhod hiya ngan nagpasalamat kan Jehova tungod kay giniyahan hiya ngadto ha mga paryente ni Abraham.

Hito nga gab-i, ginsumatan han surugoon ni Abraham hi Betuel ngan an bugto ni Rebeka nga hi Laban kon kay ano nga kinadto hiya. Inuyon hira nga umupod ha iya hi Rebeka basi magin asawa ni Isaak. Ano an baton ni Rebeka han ginpakianhan hiya? Siring niya, ‘Oo.’ Karuyag niya umupod. Salit kinabuwasan, sinakay hira ha mga kamelyo ngan nagbyahe hin hirayo tipabalik ha Kanaan.

Gab-i na han inabot hira. Nakita ni Rebeka an usa nga lalaki nga naglalakat-lakat ha uma. Hi Isaak ito. Nalipay gud hi Isaak han nakita hi Rebeka. Tulo pa la ka tuig tikang nga namatay an nanay ni Isaak nga hi Sara, ngan masurub-on pa gihapon hiya tungod hito. Kondi nalipay na liwat hi Isaak tungod han iya daku nga gugma kan Rebeka.