KITAA, nasusubo gud ini nga batan-on. Hiya hi Jose. Iginbaligya pa la hiya han iya kabugtoan ha mga tawo nga tikadto ha Ehipto. Didto, magigin uripon hiya. Kay ano nga ginbuhat han iya kabugtoan ini nga karaotan? Tungod kay naaawa hira ha iya.

Hinigugma gud hi Jose han ira tatay nga hi Jakob. Ipinakita ni Jakob nga pinaura gud niya hi Jose tungod kay ginpahimoan niya hi Jose hin maopay ngan hilawig nga bado. Han naobserbahan han iya 10 nga kabugtoan nga hinigugma gud hiya ni Jakob, naawa hira ngan nasina gud ha iya. Kondi may-ada pa iba nga hinungdan kon kay ano nga nasisina hira ha iya.

Nagkaada hin duha nga inop hi Jose. Hito nga mga inop, an iya kabugtoan nagyukbo ha iya. Han iginsumat ni Jose ha iya kabugtoan an iya mga inop, dinugang an ira kasina.

Usa ka adlaw, han an kabugtoan ni Jose nagbabantay ha kakarnerohan han ira tatay, ginsugo ni Jakob hi Jose nga kadtoon hira basi hibaroan kon ano an ira kahimtang. Han nakita han iya kabugtoan nga tiabot hiya, an iba nagsiring: ‘Patayon naton hiya!’ Kondi an suhag nga hi Ruben nagsiring: ‘Ayaw niyo pagbuhata ito!’ Lugod ira ginrabot hi Jose ngan iginhulog ha usa nga atabay nga waray tubig. Katapos, nangalingkod hira basi mag-iristorya kon ano an pagbubuhaton ha iya.

Hito nga takna, may-ada naagi nga mga Ismaelihanon. Ngan hi Juda nagsiring ha iya kabugtoan: ‘Ibaligya naton hiya ha mga Ismaelihanon.’ Ngan ito an ira ginbuhat. Iginbaligya nira hi Jose hin 20 ka bug-os nga salapi. Maraot gud ito nga ira ginbuhat!

Ano an isusumat han magburugto ha ira tatay? Nagpatay hira hin kanding ngan pauroutro nga igintunlob nira ha dugo han kanding an maopay nga bado ni Jose. Katapos, ira gindara an bado ngadto ha ira tatay nga hi Jakob ngan nagsiring: ‘Amon hin-agian ini. Alayon kitaa ngan kilalaha kon bado ini ni Jose.’

Nakilala ni Jakob nga bado ito ni Jose. Salit nagsinggit hiya: ‘Sigurado nga usa nga mabangis nga hayop an nagpatay ha iya.’ Ito gud an karuyag han iya kabugtoan nga hunahunaon han ira tatay. Nasubo gud hi Jakob. Nagtinangis hiya ha sulod hin damu ka adlaw. Pero diri patay hi Jose. Aton kitaon kon ano an nahitabo kan Jose ha lugar nga gindad-an ha iya.