ABAADAW! Ano an nahitatabo dinhi? Ano an nahitabo ha bata nga nahigda ha tuna? Kitaa! Usa hi Pablo han kalalakin-an nga ginawas ha balay! Nakikita mo ba liwat hi Timoteo? Nahulog ba an bata ha bintana?

Oo, ito gud an nahitabo. Nagdidiskurso hi Pablo ha mga disipulo dinhi ha Troas. Maaram hiya nga maiha pa antes niya hira makita utro tungod kay kinabuwasan magbibyahe na hiya. Salit nagdiskurso hiya tubtob ha katutnga han gab-i.

Ini nga bata nga hi Eutiko nalingkod ha bintana, ngan nahingaturog hiya. Nahulog hiya ha bintana, tikang ha ikatulo ka andana! Salit nakikita mo nga nababaraka gud an mga tawo. Han ginpurot han mga tawo ini nga bata, hinbaroan nira nga patay na hiya!

Han nakita ni Pablo nga patay na an bata, iya gintungbawan ngan ginhangkopan ito. Katapos, hiya nagsiring: ‘Ayaw kamo kabaraka. Talwas na hiya!’ Tinuod ito! Milagro ito! Ginbanhaw hiya ni Pablo! Salit nalipay gud an mga tawo.

Hira ngatanan nagkasaka utro ha balay ngan nangaon. Nagpadayon hi Pablo ha pag-istorya tubtob ha kaaga. Kondi sigurado nga waray na kumaturog utro hi Eutiko! Katapos, hira Pablo, Timoteo ngan adton kaupod nira ha byahe, nagkasakay ha barko. Maaram ka ba kon tikain hira?

Matatapos na ni Pablo an iya ikatulo nga byahe ha pagsangyaw, ngan tiuli na hiya. Hini nga byahe, tulo ka tuig nga inukoy hi Pablo nga nag-uusahan ha syudad han Efeso. Salit mas maiha ini kay ha iya ikaduha nga byahe.

Pagbaya ha Troas, dinuong hin madaliay an barko ha Mileto. Tungod kay hirani la an Efeso, ginpakadto ni Pablo ha Mileto an mga tigurang ha kongregasyon basi makaistorya hira ha ultimo nga higayon. Katapos, han tibyahe na an barko, nasubo gud an mga tigurang nga mabaya na hi Pablo!

Inabot an barko ha Cesarea. Samtang naukoy hi Pablo didto ha balay han disipulo nga hi Felipe, ginpahamangnoan hiya ni propeta Agabo. Siring ni Agabo nga mapipriso hi Pablo kon kumadto hiya ha Jerusalem. Ngan ito gud an nahitabo. Katapos mapriso hin duha ka tuig ha Cesarea, gindara hi Pablo ha Roma basi bistahon ha atubangan han Romano nga magmarando nga hi Cesar. Aton kitaon kon ano an nahitabo ha byahe tipakadto ha Roma.