MAARAM ka ba kon hin-o ini nga babaye ngan ini nga duha nga lalaki? An babaye amo hi Maria Magdalena, usa nga sangkay ni Jesus. Ngan an duha nga lalaki nga busag an bado, mga anghel. Ini nga gutiay nga kwarto nga ginhihiling ni Maria amo an lugar nga ginbutangan han patay nga lawas ni Jesus. Tinatawag ito nga lubnganan. Kondi, waray na dida an lawas! Hin-o an nagkuha hito? Aton usisahon.

Han namatay hi Jesus, an mga saserdote nagsiring kan Pilato: ‘Han buhi pa hi Jesus, nagsiring hiya nga babanhawon hiya paglabay hin tulo ka adlaw. Salit pabantayi an iya lubnganan basi diri kawaton han iya mga disipulo an iya lawas ngan magsiring hira nga ginbanhaw hiya!’ Ginsidngan ni Pilato an mga saserdote nga magsugo hin mga sundalo ha pagbantay han lubnganan.

Kondi han kaagahon han ikatulo ka adlaw tikang han kamatay ni Jesus, an anghel ni Jehova tigda nga inabot. Ginpakaliding niya an bato tikang ha ganghaan han lubnganan. Nahadlok gud an mga sundalo salit waray hira makagios. Katapos, han ginkita nira an sulod han lubnganan, waray na an lawas! An iba nga sundalo kinadto ha syudad ngan ginsumatan an mga saserdote. Maaram ka ba kon ano an ginbuhat han magraot nga saserdote? Ginbaydan nira an mga sundalo basi magbuwa. ‘Siring kamo nga kinadto an iya mga disipulo han gab-i samtang nangangaturog kamo, ngan ginkawat an iya lawas,’ ginsidngan han mga saserdote an mga sundalo.

Hito nga panahon, ginbisita han pipira nga kababayin-an nga kasangkayan ni Jesus an lubnganan. Nahipausa gud hira nga waray na ito sulod! Tigda nga nagpakita an duha nga anghel nga masilaw an bado. ‘Kay ano nga ginbibiling niyo dinhi hi Jesus?’ nagpakiana hira. ‘Ginbanhaw na hiya. Pagdali kamo ngan sumati an iya mga disipulo.’ Nagdadlagan an kababayin-an! Kondi ha dalan may-ada lalaki nga tinapo ha ira. Maaram ka ba kon hin-o ito? Hi Jesus! ‘Sumati an akon mga disipulo,’ siring niya.

Han an mga disipulo ginsumatan han kababayin-an nga buhi hi Jesus ngan nakita nira, diri makatoo an mga disipulo. Nagdadlagan hira Pedro ngan Juan ngadto ha lubnganan basi kitaon mismo ito, kondi waray na ito sulod! Pagbaya nira nagpabilin hi Maria Magdalena. Ito an higayon nga hiniling hiya ngan nakita an duha nga anghel.

Maaram ka ba kon ano an nahitabo ha lawas ni Jesus? Ginpahinabo han Dios nga mawara ito. Waray Niya banhawa hi Jesus ha amo la gihapon nga unudnon nga lawas. Gintagan Niya hi Jesus hin bag-o nga espiritu nga lawas, sugad han lawas han mga anghel ha langit. Kondi basi maipakita ni Jesus ha iya mga disipulo nga nabuhi hiya, nagsul-ot hiya hin lawas nga makikita han mga tawo, sugad han aton hibabaroan.