AN LALAKI dinhi nga naluhod amo hi Esteban. Matinumanon hiya nga disipulo ni Jesus. Kondi kitaa an nahitatabo ha iya! Ginbabato hiya hini nga mga tawo. Kay ano nga nasisina gud hira kan Esteban nga tungod hito ira ginbabato hiya? Aton kitaon.

Ginbuligan han Dios hi Esteban ha pagbuhat hin urusahon nga mga milagro. Waray maruyag ini nga mga tawo han iya ginbuhat, salit nakiglantugi hira mahitungod han kamatuoran nga iya igintutdo. Kondi gintagan han Dios hi Esteban hin daku nga kinaadman, ngan iginpakita niya nga buwa an igintututdo hini nga mga tawo. Tungod hini mas nasina hira. Salit ira gindakop hiya ngan nagbiling hin mga tawo nga magsusumat hin buwa kontra ha iya.

An hitaas nga saserdote nagpakiana kan Esteban: ‘Tinuod ba ini?’ Binaton hiya pinaagi hin maopay nga diskurso nga iginbasar ha Biblia. Ha kataposan hito, nagsiring hiya nga nasina gud an magraot nga tawo ha mga propeta ni Jehova hadto. Katapos, hiya nagsiring: ‘Pariho gud kamo hito nga mga tawo. Iyo ginpatay an surugoon han Dios nga hi Jesus, ngan waray niyo sunda an mga balaud han Dios.’

Tungod hini, nasina gud an mga lider han relihiyon! Nangigot an ira mga ngipon tungod ha kasina. Kondi, hinangad hi Esteban ngan nagsiring: ‘Kitaa! Nakikita ko hi Jesus nga natukdaw ha too han Dios ha langit.’ Dida hito, gintabonan han mga tawo an ira mga talinga han ira mga kamot, gindasmagan hi Esteban, ngan gindanas hiya ha gawas han syudad.

Dinhi, ira ginhukas an ira panggawas nga mga bado ngan iginhatag ha batan-on nga hi Saulo basi bantayan ito. Nakikita mo ba hi Saulo? Katapos, ginbato han iba hi Esteban. Linuhod hiya, sugad han imo nakikita, ngan nag-ampo ha Dios: ‘Jehova, ayaw hira siruti tungod hini nga ira ginbuhat nga maraot.’ Maaram hiya nga an iba ha ira nalimbongan han mga lider han relihiyon. Katapos hito, namatay hi Esteban.

Kon may-ada nagbubuhat ha imo hin maraot, nabulos ka ba o naghahangyo nga an Dios an bumulos ha ira? Waray ito buhata ni Esteban o ni Jesus. Buotan hira bisan ha mga diri buotan ha ira. Aton subaron hira.