HI APOSTOL Pedro ini nga natindog, ngan iya kasangkayan an aada ha iya luyo. Kondi kay ano nga nayukbo kan Pedro ini nga lalaki? Husto ba nga buhaton niya ini? Maaram ka ba kon hin-o hiya?

Hiya hi Cornelio. Opisyal hiya han Romano nga kasundalohan. Diri kilala ni Cornelio hi Pedro, kondi ginsidngan hiya nga imbitaron hi Pedro ha iya balay. Aton kitaon kon paonan-o ini nahitabo.

An siyahan nga mga sumurunod ni Jesus mga Judio, kondi hi Cornelio diri Judio. Pero nahigugma hiya ha Dios, nag-aampo ha iya, ngan nabulig ha mga tawo. Usa ka kulop, may-ada anghel nga nagpakita ha iya ngan nagsiring: ‘Nalilipay an Dios ha imo, ngan babatunon niya an imo mga pag-ampo. Pagsugo hin kalalakin-an nga pakanhion hi Pedro. Naukoy hiya ha Jope ha balay ni Simon nga aadto ha ligid han dagat.’

Nagsugo dayon hi Cornelio hin kalalakin-an basi bilngon hi Pedro. Kinabuwasan, han hirani na hira ha Jope, nakadto hi Pedro ha planudo nga atop han balay ni Simon. Didto, iginpakita han Dios kan Pedro an usa nga halapad nga taklap tikang ha langit. Ha taklap, aada an ngatanan nga klase han mga hayop. Ha balaud han Dios, mahugaw ito nga mga hayop ngan diri angay kaunon, kondi may-ada tingog nga nagsiring: ‘Buhát, Pedro. Pag-ihaw ngan kaon.’

‘Diri!’ binaton hi Pedro. ‘Waray pa gud ako kumaon hin mahugaw.’ Kondi an tingog nagsiring: ‘Ayaw pagtawaga nga mahugaw an ginlimpyohan na han Dios.’ Tulo ka beses ini nga nahitabo. Samtang nahipapausa hi Pedro kon ano an kahulogan hini, nagkaabot an kalalakin-an nga ginsugo ni Cornelio ngan ginbiling hi Pedro.

Linusad hi Pedro ngan nagsiring: ‘Ako an iyo ginbibiling. Kay ano nga kinanhi kamo?’ Han iginsaysay nira nga ginsidngan hi Cornelio han anghel nga imbitaron hi Pedro ha iya balay, inuyon hi Pedro nga umupod ha ira. Kinabuwasan, linakat hi Pedro ngan an iya kasangkayan basi bisitahon hi Cornelio ha Cesarea.

Gintirok ni Cornelio an iya mga paryente ngan duok nga kasangkayan. Pag-abot ni Pedro, gintapo hiya ni Cornelio. Hinapa hi Cornelio ngan yinukbo ha iya, sugad han imo nakikita dinhi. Kondi hi Pedro nagsiring: ‘Buhát; tawo la ako.’ Oo, ipinapakita han Biblia nga sayop an pagyukbo ngan pagsingba ha tawo. Hi Jehova la an angay naton singbahon.

Katapos, nagsangyaw hi Pedro ha mga nagkakatirok. ‘Nasabtan ko nga kinakarawat han Dios an ngatanan nga tawo nga naruruyag mag-alagad ha iya,’ siring niya. Ngan samtang nagyayakan hiya, iginbubo han Dios an iya baraan nga espiritu, ngan an mga tawo nagyakan hin iba-iba nga yinaknan. Salit, nahipausa an Judio nga mga disipulo nga kaupod ni Pedro tungod kay kahuna nira nga mga Judio la an inuuyonan han Dios. Igintututdo hini nga an Dios waray ginpapasulabi nga klase hin mga tawo. Maopay nga hinumdoman naton ito, diri ba?