KITAA an mga kadena ni Pablo, ngan an Romano nga sundalo nga nagbabantay ha iya. Priso hi Pablo dinhi ha Roma. Ginhuhulat niya an desisyon ni Cesar han Roma kon ano an pagbubuhaton ha iya. Samtang priso hiya, gintugotan an mga tawo nga bumisita ha iya.

Paglabay hin tulo ka adlaw tikang nga inabot ni Pablo ha Roma, nagpadara hiya hin mensahe ha pipira nga Judio nga lider nga bisitahon hiya. Salit, damu nga Judio ha Roma an binisita ha iya. Ginsangyawan hira ni Pablo mahitungod kan Jesus ngan han Ginhadian han Dios. Tinoo an iba ngan nagin mga Kristiano, kondi waray tumoo an iba.

Ginsangyawan liwat ni Pablo an iba-iba nga sundalo nga nagbabantay ha iya. Ha duha ka tuig nga pagin priso dinhi ni Pablo, nagsangyaw hiya ha bisan hin-o. Tungod hito, bisan an pamilya ni Cesar nakabati han maopay nga sumat han Ginhadian, ngan an iba ha ira nagin mga Kristiano.

Kondi hin-o ini nga bisita nga nagsusurat ha lamesa? Kilala mo ba hiya? Oo, hiya hi Timoteo. Napriso liwat hiya tungod ha pagsangyaw han Ginhadian, kondi nakagawas na hiya. Ngan kinanhi hiya basi buligan hi Pablo. Maaram ka ba kon ano an ginsusurat ni Timoteo? Aton kitaon.

Nahinunumdoman mo ba an mga syudad han Filipos ngan Efeso ha Istorya 110? Binulig hi Pablo ha pag-organisa han Kristiano nga mga kongregasyon hito nga mga syudad. Yana, samtang priso hi Pablo, ginsuratan niya ini nga mga Kristiano. Ini nga mga surat aada ha Biblia, ngan tinatawag ini nga Mga Taga-Efeso ngan Mga Taga-Filipos. Igindidikta ni Pablo kan Timoteo an iya isusurat ha ira Kristiano nga kasangkayan ha Filipos.

An mga taga-Filipos buotan gud kan Pablo. Nagpadara hira hin regalo ha iya ha prisohan, salit nagpapasalamat hi Pablo tungod hito. Hi Epaprodito an nagdara han regalo. Kondi nagkasakit hiya hin grabe ngan haros mamatay. Yana, maopay na hiya ngan andam na ha pag-uli. Dadad-on niya ini nga surat nira Pablo ngan Timoteo ha pagbalik niya ha Filipos.

Samtang priso hi Pablo, duha pa nga surat an iya ginhimo nga aton mababasa ha Biblia. Usa hito an surat ha mga Kristiano ha syudad han Kolosas. Maaram ka ba kon ano an tawag hito? Mga Taga-Kolosas. An usa pa amo an personal nga surat iya duok nga sangkay nga hi Filemon nga taga-Kolosas liwat. Mahitungod ito ha surugoon ni Filemon nga hi Onesimo.

Linayas hi Onesimo kan Filemon ngan kinanhi ha Roma. Hinbaroan ni Onesimo nga priso dinhi hi Pablo. Binisita hiya, ngan ginsangyawan hiya ni Pablo. Waray pag-iha, nagin Kristiano liwat hi Onesimo. Yana, nagbabasol hiya nga linayas hiya. Maaram ka ba kon ano an ginsiring ni Pablo hini nga surat kan Filemon?

Ginhangyo ni Pablo hi Filemon nga pasayloon hi Onesimo. ‘Ginpapabalik ko hiya ha imo,’ nagsurat hi Pablo. ‘Kondi yana, diri na hiya surugoon mo la. Maopay liwat hiya nga Kristiano nga bugto.’ Pagbalik ni Onesimo ha Kolosas, dara niya ini nga duha nga surat, an usa para ha mga taga-Kolosas ngan an usa para kan Filemon. Sigurado kita nga nalipay gud hi Filemon han hinbaroan niya nga an iya surugoon nagin Kristiano na.

Han nagsurat hi Pablo ha mga taga-Filipos ngan kan Filemon, may-ada hiya maopay gud nga sumat. ‘Pakakadaon ko hi Timoteo ha iyo,’ siring ni Pablo ha mga taga-Filipos. ‘Kondi diri na mag-iiha, mabisita liwat ako ha iyo.’ Ngan kan Filemon, hiya nagsurat: ‘Pag-andam hin lugar nga akon mauukyan.’

Han nakagawas na hi Pablo, ginbisita niya an iya mga igkasi-Kristiano ha iba-iba nga lugar. Kondi waray pag-iha, napriso utro hi Pablo ha Roma. Hini nga higayon, maaram hiya nga papatayon hiya. Salit nagsurat hiya kan Timoteo ngan naghangyo nga bisitahon dayon hiya. ‘Matinumanon ako ha Dios, ngan babalosan Niya ako,’ nagsurat hi Pablo. Paglabay hin pipira ka tuig katapos patayon hi Pablo, ginbungkag utro an Jerusalem, hini nga higayon, han mga Romano.

Kondi damu pa an aton mahibabaroan ha Biblia. Iginpasurat ni Jehova nga Dios kan apostol Juan an kataposan nga mga libro hito, upod na an libro han Pahayag. Iginsusumat hini nga libro han Biblia an tidaraon. Aton usisahon kon ano an mahitatabo ha tidaraon.