INI nga mga tawo dinhi ha retrato, mga sumurunod ni Jesus. Ira ginsunod hiya ngan nagpabilin hira ha Jerusalem. Samtang tarampo nga naghuhulat hira ngatanan, nagkaada hin duro nga aringasa ha bug-os nga balay. Baga ito hin haganas han makusog nga hangin. Katapos, nagkaada sugad hin dila nga kalayo ha bawbaw han ulo han tagsa nga disipulo. Nakikita mo ba ito ha bawbaw han ira ulo? Ano an kahulogan hito?

Usa gud ito nga milagro! Aadto na hi Jesus ha langit kaupod han iya Amay, ngan iya iginbubo an baraan nga espiritu han Dios ha iya mga sumurunod. Maaram ka ba kon ano an ira nahimo pinaagi hini nga espiritu? Hira ngatanan nakagyakan hin iba-iba nga yinaknan.

Damu nga tawo ha Jerusalem an nakabati han aringasa nga sugad hin haganas han makusog nga hangin, ngan nagpakadto hira basi makita kon ano an nahitatabo didto. An iba ha ira tikang pa ha iba-iba nga nasud nga kinadto para ha pyesta han Pentekostes han mga Israelita. Nahipausa gud ito nga mga bisita! Hinbatian nira an mga disipulo nga nagyayakan han ira mismo mga yinaknan mahitungod han urusahon nga ginbuhat han Dios.

‘Mga taga-Galilea ini nga mga tawo,’ siring han mga bisita. ‘Kay ano nga nakakagyakan hira han mga yinaknan han aton mga nasud?’

Tinindog hi Pedro basi isaysay ito ha ira. Ha daku nga tingog, ginsumatan niya hira nga ginpatay hi Jesus kondi ginbanhaw hiya ni Jehova. ‘Yana aadto na hi Jesus ha langit ha too han Dios,’ siring ni Pedro. ‘Ngan iya iginbubo an iginsaad nga baraan nga espiritu. Ito an hinungdan kon kay ano nga nakikita ngan nababatian niyo ini nga mga milagro.’

Han ginsiring ini ni Pedro, damu an nasubo gud ha ginbuhat kan Jesus. ‘Ano an kinahanglan namon buhaton?’ nagpakiana hira. Hi Pedro nagsiring ha ira: ‘Kinahanglan magbag-o kamo ngan magpabawtismo.’ Salit hito mismo nga adlaw, mga 3,000 an nabawtismohan ngan nagin mga sumurunod ni Jesus.