KITAA an batan-on nga nakikiistorya hini nga katigurangan. Mga magturutdo hira ha templo han Dios ha Jerusalem. Ngan ini nga batan-on amo hi Jesus. Dinaku na hiya. Dose anyos na hiya yana.

Nahipapausa gud ha iya an mga magturutdo tungod kay damu an iya hinbabaroan mahitungod ha Dios ngan ha mga sinurat ha Biblia. Kondi kay ano nga waray dinhi ha retrato hira Jose ngan Maria? Hain hira? Aton kitaon.

Kada tuig gindadara ni Jose an iya pamilya ngadto ha Jerusalem para ha espesyal nga selebrasyon nga tinatawag nga Paskua. Hirayo ito nga byahe tikang ha Nasaret. Waray awto, ngan waray liwat mga tren kay waray pa hito nga mga sarakyan hadto. Damu nga tawo an nagbabaktas, ngan naabot hin mga tulo ka adlaw an ira pagbaktas ngadto ha Jerusalem.

Yana, daku na an pamilya ni Jose. Salit, may-ada hiya gin-aasikaso nga kamanghoran ni Jesus nga kalalakin-an ngan kababayin-an. Hini nga panahon, tipauli na ngadto ha Nasaret hira Jose ngan Maria kaupod an ira mga anak. Kahuna nira nga hi Jesus kaupod han iba. Kondi han nanmahuway hira han kulop na, waray nira hikit-i hi Jesus. Ginbiling nira hiya ha ira mga paryente ngan kasangkayan, kondi waray hiya didto! Salit binalik hira ha Jerusalem basi bilngon hiya.

Hin-agian nira hi Jesus nga nakadto ha mga magturutdo. Nagpipinamati ngan nagpipinakiana hiya ha ira. Ngan an ngatanan nga tawo didto nanhipausa han iya kinaadman. Kondi hi Maria nagsiring: ‘Anak, kay ano nga ginbuhat mo ini ha amon? Nabaraka gud kami ni imo tatay salit ginpinamiling ka namon.’

‘Kay ano nga ginpinamiling niyo ako?’ siring ni Jesus. ‘Diri ba kamo maaram nga kinahanglan aanhi ako ha balay han akon Amay?’

Oo, naruruyag gud hi Jesus ha lugar diin mahibabaro hiya mahitungod ha Dios. Ito liwat an sadang naton abaton, diri ba? Ha Nasaret, natambong hiya ha mga katirok ha pagsingba kada semana. Tungod kay pirme hiya namamati hin maopay, damu an iya hinbaroan ha Biblia. Salit, subaron naton hi Jesus.