USA ka adlaw nagsiring hi Jesus ha usa nga lalaki nga sadang higugmaon niya an iya igkasi-tawo. An lalaki nagpakiana kan Jesus: ‘Hin-o an akon igkasi-tawo?’ Maaram hi Jesus kon ano an ginhuhunahuna hini nga lalaki. Naghuhunahuna ini nga lalaki nga an mga tawo la nga kapariho han iya nasyonalidad ngan relihiyon an iya igkasi-tawo. Salit aton kitaon kon ano an ginsiring ni Jesus ha iya.

Usahay nagtututdo hi Jesus pinaagi hin istorya, sugad han iya ginbuhat yana. Nag-istorya hiya mahitungod han usa nga Judio ngan usa nga Samaritano. Hinbaroan na naton nga nasisina an kadam-an nga Judio ha mga Samaritano. Ini an istorya ni Jesus:

Usa ka adlaw, may-ada Judio nga nagbabaktas ha dalan tipakadto ha Jeriko. Kondi gin-atake hiya han mga kawatan. Ira ginkuha an iya kwarta ngan ginkastigo tubtob nga haros patay na hiya.

Waray pag-iha, inagi an Judio nga saserdote. Nakita niya an ginkastigo nga lalaki. Ha imo hunahuna, ano an iya ginbuhat? Aw, naglikay hiya ngan nagpadayon ha pagbaktas. Katapos, inagi an usa pa nga relihiyoso gud nga tawo. Usa hiya nga Lebihanon. Inundang ba hiya? Waray. Waray liwat hiya umundang basi buligan an ginkastigo. Nakikita mo ba dinhi ha retrato an saserdote ngan an Lebihanon nga hirayo na?

Kondi kitaa kon hin-o dinhi an kaupod han ginkastigo nga lalaki. Usa hiya nga Samaritano. Ginbuligan niya an Judio ngan gintambal an mga samad. Ngan gindara an Judio ha lugar diin makakapahuway ngan mag-oopay hiya.

Katapos ni Jesus mag-istorya, nagpakiana hiya ha lalaki: ‘Ha hunahuna mo, hin-o hini nga tulo an igkasi-tawo han ginkastigo nga lalaki? An saserdote ba, an Lebihanon, o an Samaritano?’

An lalaki binaton: ‘An Samaritano. Ginbuligan niya an lalaki nga ginkastigo.’

Hi Jesus nagsiring: ‘Husto ka. Salit lakat ngan buhata ha iba an ginbuhat niya.’

Naruyagan mo ba an paagi han pagtutdo ni Jesus? Damu gud nga importante nga butang an aton hibabaroan kon mamati kita ha ginsisiring ni Jesus ha Biblia, diri ba?