KITAA an sarapati nga tihapon ha ulo hini nga lalaki. Hi Jesus ini nga lalaki. Haros 30 anyos na hiya yana. Ngan an kaupod niya amo hi Juan. May-ada na kita hinbaroan mahitungod kan Juan. Nahinunumdom ka ba han binisita hi Maria ha iya paryente nga hi Elisabet, ngan an bata ha tiyan ni Elisabet linukso ha kalipay? Hi Juan adto nga iginbuburod ni Elisabet. Kondi ano an ginbubuhat nira Juan ngan Jesus dinhi?

Iginpailarom pa la ni Juan hi Jesus ha Salog Jordan. Amo ini an pagbawtismo. Siyahan, iginpapailarom an usa ha tubig, katapos iginbabangon utro. Tungod kay ini an ginbubuhat ni Juan ha mga tawo, gintawag hiya nga Juan nga Parabawtismo. Kondi, kay ano nga ginbawtismohan ni Juan hi Jesus?

Ginbuhat ito ni Juan tungod kay naghangyo ha iya hi Jesus nga bawtismohan hiya. Ginbabawtismohan ni Juan an mga tawo nga nagpapakita hin pagbasol han ira magraot nga buhat. Kondi may-ada ba maraot nga nabuhat hi Jesus nga sadang niya pagbasolan? Waray gud, tungod kay hiya an Anak han Dios nga tikang ha langit. Salit ginhangyo niya hi Juan nga bawtismohan hiya tungod hin lain nga hinungdan. Aton kitaon kon ano ito.

Antes kumanhi hi Jesus kan Juan, usa hiya nga panday. An trabaho han panday amo an panhimo hin mga muwebles nga kahoy sugad han mga lamesa, lingkoran ngan bangko. An bana ni Maria nga hi Jose usa nga panday, ngan iya gintutdoan hi Jesus nga magin panday liwat. Kondi waray pakanhia ha tuna ni Jehova an iya Anak nga hi Jesus basi magin panday. May-ada Hiya espesyal nga iginpapabuhat kan Jesus, ngan panahon na basi tikangan ito. Salit basi ipakita ni Jesus nga andam na hiya ha pagbuhat han kaburut-on han iya Amay, ginhangyo niya hi Juan nga bawtismohan hiya. Nalipay ba hito an Dios?

Oo, nalipay Hiya, tungod kay han hinaw-as hi Jesus ha tubig, usa nga tingog tikang ha langit an nagsiring: ‘Ini an akon Anak nga akon nalilipayan.’ Ngan, baga hin naabrihan an langit ngan ini nga sarapati hinapon kan Jesus. Kondi diri ini tinuod nga sarapati. Baga la ini hin sarapati. Ini an baraan nga espiritu han Dios.

Yana damu an angay pamalandungon ni Jesus, salit kinadto hiya ha mamingaw nga lugar ngan nagpabilin didto ha sulod hin 40 ka adlaw. Didto, kinadto ha iya hi Satanas. Tulo ka beses nga ginsulay niya hi Jesus nga diri sundon an Dios. Kondi waray ito buhata ni Jesus.

Katapos hito, inuli hiya ngan iginkita niya an pipira nga tawo nga nagin iya siyahan nga mga sumurunod, o disipulo. An iba ha ira amo hira Andres, Pedro (tinatawag liwat nga Simon), Felipe ngan Nataniel (tinatawag liwat nga Bartolome). Hi Jesus ngan ini nga bag-o nga mga disipulo kinadto ha distrito han Galilea. Didto ha Galilea, hinuron hira ha Kana, nga bungto ni Nataniel. Tinambong didto hi Jesus ha usa nga panagtawo han kasal, ngan nagbuhat han iya siyahan nga milagro. Maaram ka ba kon ano ito? Ginhimo niya nga alaksiw an tubig.