HI Maria ini nga mahusay nga babaye. Usa hiya nga Israelita nga naukoy ha bungto han Nasaret. Maaram an Dios nga buotan hiya hinduro. Salit ginsugo Niya hi anghel Gabriel nga kaistoryahon hiya. Maaram ka ba kon ano an ginsiring ni Gabriel kan Maria? Aton kitaon.

‘Maghimaya ka, pinalabi ka kaopay. Hi Jehova upod nimo,’ siring ni Gabriel ha iya. Yana pa gud la hiya nakita ni Maria. Nabaraka hiya tungod kay diri hiya maaram kon ano an kahulogan han ginsiring ni Gabriel. Kondi ginpakalma dayon hiya ni Gabriel.

‘Ayaw kahadlok, Maria,’ siring niya. ‘Nalilipay gud hi Jehova ha imo. Salit may-ada hiya bubuhaton ha imo nga urusahon. Diri mag-iiha, magkakaada ka hin anak. Ngan tatawagon mo hiya nga Jesus.’

Nagpadayon ha pagsaysay hi Gabriel: ‘Ini nga bata magigin bantogan, ngan tatawagon hiya nga Anak han Gihitaasi nga Dios. Hihimoon hiya ni Jehova nga hadi, sugad kan David. Kondi hi Jesus magigin hadi ha kadayonan, ngan an iya ginhadian waray gud kataposan!’

‘Paonan-o ini mahitatabo?’ nagpakiana hi Maria. ‘Waray pa ngani ako asawa. Waray pa ako makaupod hin lalaki, salit paonan-o ako magkakaanak?’

‘Makada ha imo an espiritu han Dios,’ binaton hi Gabriel. ‘Salit an bata tatawagon nga anak han Dios.’ Katapos ginsidngan niya hi Maria: ‘Hinumdumi an imo paryente nga hi Elisabet. Siring han mga tawo nga diri na hiya mag-aanak kay lagas na hiya. Kondi diri mag-iiha magkakaanak na hiya. Salit waray imposible ha Dios, diri ba?’

Nagsiring dayon hi Maria: ‘Surugoon ako ni Jehova! Hinaot matuman ha akon an imo ginsiring.’ Katapos, binaya an anghel.

Ginbisita dayon ni Maria hi Elisabet. Han hinbatian ni Elisabet an tingog ni Maria, an bata ha tiyan ni Elisabet linukso ha kalipay. Napuno han espiritu han Dios hi Elisabet ngan nagsiring hiya kan Maria: ‘Bulahan ka labaw han ngatanan nga kababayin-an.’ Nag-ukoy hi Maria kanda Elisabet hin tulo ka bulan, katapos inuli hiya ha Nasaret.

Karaslon na hira Maria ngan Jose. Kondi han hinbaroan ni Jose nga burod hi Maria, naghunahuna hi Jose nga diri na hiya makikig-asawa kan Maria. Katapos nagsiring ha iya an anghel han Dios: ‘Ayaw pag-alang ha pakig-asawa kan Maria. Tungod kay an Dios an naghatag ha iya hin anak.’ Salit nag-asawa hi Maria ngan hi Jose, ngan naghulat hira nga matawo hi Jesus.