DINHI hini nga retrato, baga hin nasisina gud hi Jesus, diri ba? Maaram ka ba kon kay ano? Tungod kay sobra kahakog ini nga mga tawo ha templo han Dios ha Jerusalem. Ginsasalingabot nira nga makaganansya hin daku tikang ha mga tawo nga napakanhi ha pagsingba ha Dios.

Nakikita mo ba an mga baka, karnero, ngan sarapati? Iginbabaligya ini hinin kalalakin-an dinhi mismo ha templo. Maaram ka ba kon kay ano? Tungod kay an mga Israelita nagkikinahanglan hin mga hayop ngan tamsi ha paghalad ha Dios.

An balaud han Dios nasiring nga kon may-ada Israelita nga nakabuhat hin sayop, sadang hiya maghalad ha Dios. Ngan may-ada liwat iba pa nga panahon nga kinahanglan maghalad an mga Israelita. Kondi diin hira makakakuha hin mga tamsi ngan hayop nga ihahalad?

An iba nga Israelita may-ada kalugaringon nga mga tamsi ngan hayop. Salit mahimo nira ihalad ito. Kondi damu nga Israelita an waray gintatag-iya nga mga hayop ngan mga tamsi. Ngan an iba nga naukoy ha lugar nga hirayo gud ha Jerusalem diri nakakagdara hin hayop nganhi ha templo. Salit dinhi na la hira napalit hin mga hayop ngan mga tamsi nga ira ihahalad. Kondi sobra kamahal an prisyo han baligya hini nga mga tawo. Ginlilimbongan nira an mga tawo. Gawas pa hito, diri hira angay magbaligya ha sulod mismo han templo han Dios.

Ini an nakapasina kan Jesus. Salit ginpamaliskad niya an mga lamesa han mga magbaraligya ngan nagsarang an ira mga kwarta. Ngan kinuha hiya hin pisi nga panlatob ngan gintabog an ngatanan nga hayop tipagawas ha templo. Ginsugo niya an mga tawo nga nagbabaligya han mga sarapati: ‘Kuhaa niyo ini! Ayaw niyo himoa nga baraligyaan an balay han akon Amay.’

Upod ni Jesus ha templo ha Jerusalem an iba han iya mga sumurunod. Nahipausa hira ha ginbuhat ni Jesus. Katapos, ira nahinumdoman an gin-unabi ha Biblia mahitungod han Anak han Dios: ‘An iya gugma ha balay han Dios naglalaga sugad hin kalayo.’

Samtang aanhi hi Jesus ha Jerusalem ha pagtambong han Paskua, nagbuhat hiya hin damu nga milagro. Katapos, binaya hiya ha Judea ngan binalik ha Galilea. Kondi han nagbibiyahe na hiya, inagi hiya ha distrito han Samaria. Kitaon naton kon ano an nahitabo didto.