KITAA an makasurubo nga nahitatabo! Tikamatay na hi Jesus. Iginraysang an iya mga kamot ngan tiil ha usa nga kahoy. Kay ano nga ginbuhat ini kan Jesus?

Tungod kay may-ada mga nasisina ha iya. Maaram ka ba kon hin-o hira? Usa ha ira amo an duro karaot nga anghel nga hi Satanas nga Yawa. Hiya an nag-aghat kanda Adan ngan Eva nga diri sundon hi Jehova. Ngan hi Satanas an nagmaniobra nga buhaton han mga kaaway ni Jesus ini nga krimen.

Bisan antes iraysang hi Jesus dinhi hini nga kahoy, damu na an ginbuhat nga maraot ha iya han iya mga kaaway. Nahinunumdoman mo ba han kinadto hira ha hardin han Getsemani ngan gindakop hiya? Hin-o adto nga mga kaaway? Oo, hira an mga lider han relihiyon. Aton kitaon an sunod nga nahitabo.

Han gindakop hi Jesus han mga lider han relihiyon, pinalagiw an iya mga apostol. Ginbayaan nira hi Jesus nga nag-uusahan tungod kay nagkahahadlok hira. Kondi waray magpahirayo hira apostol Pedro ngan Juan. Sinunod hira basi makita kon ano an mahitatabo kan Jesus.

Gindara han mga saserdote hi Jesus ngadto ha lagas na nga hi Anas, an hitaas nga saserdote hadto. Waray hira mag-iha didto. Sunod, gindara nira hi Jesus ha balay ni Kaipas, an sinaliwan nga hitaas nga saserdote. Nagkatirok didto an damu nga lider han relihiyon.

Ha balay ni Kaipas ginhimo an pagbista. May-ada mga tawo nga ginpasumat hin buwa kontra kan Jesus. An ngatanan nga lider han relihiyon nagsiring: ‘Angay patayon hi Jesus.’ Katapos, ira gintuprahan hiya ha nawong, ngan ginsuntok hiya.

Han nahitatabo ini ngatanan, hi Pedro nakadto ha bungsaran. Mahagkot adto nga gab-i, salit nagharing an mga tawo. Samtang nagpapapaso hira ha palibot han kalayo, nakita hi Pedro han usa nga surugoon nga babaye, ngan nagsiring: ‘Ini nga tawo kaupod liwat ni Jesus.’

‘Diri, diri ako kaupod niya!’ binaton hi Pedro.

Tulo ka beses nga nagsiring an mga tawo kan Pedro nga kaupod hiya ni Jesus. Kondi, pirme hiya nagninigar. Han ikatulo nga iya pagnigar, liningi ha iya hi Jesus. Nasubo gud hi Pedro tungod han iya pagbuwa salit binaya hiya ngan nagtangis.

Han nasirang na an adlaw han Biernes nga aga, gindara hi Jesus han mga saserdote ngadto ha ira daku nga katirokan han Sanhedrin. Dinhi hira nag-iristorya han ira pagbubuhaton kan Jesus. Ira gindara hiya ngadto kan Ponsio Pilato, an magmarando ha distrito han Judea.

‘Maraot ini nga tawo,’ siring han mga saserdote kan Pilato. ‘Angay hiya patayon.’ Katapos pakianhan hi Jesus, nagsiring hi Pilato: ‘Waray ako nakikita nga sayop nga iya ginbuhat.’ Katapos, nagsugo hi Pilato nga dad-on hi Jesus kan Herodes Antipas. Hi Herodes amo an magmarando han Galilea kondi aada hiya ha Jerusalem hito nga panahon. Waray liwat hiya nakita nga sayop ni Jesus, salit iginpabalik hiya kan Pilato.

Karuyag ni Pilato nga maabswelto hi Jesus. Kondi karuyag han mga kaaway ni Jesus nga iba lugod nga priso an pagawson. Ito nga priso amo an kawatan nga hi Barabas. Udto na han gindara ni Pilato ha gawas hi Jesus. ‘Kitaa an iyo hadi!’ siring niya ha mga tawo. Kondi an punoan nga mga saserdote nagsinggit: ‘Dad-a hiya! Pataya hiya! Pataya hiya!’ Salit ginpagawas ni Pilato hi Barabas ngan gindara nira hi Jesus basi patayon.

Temprano han Biernes nga kulop iginraysang hi Jesus ha usa nga kahoy. Ha iya paluyo-luyo nga kagiliran may-ada mga kriminal nga iginraysang liwat basi mamatay, kondi waray hira dinhi ha retrato. Han hirani na mamatay hi Jesus, usa han mga kriminal an nagsiring ha iya: ‘Hinumdumi ako kon aadto ka na ha imo ginhadian.’ Ngan binaton hi Jesus: ‘Nagsasaad ako ha imo nga makakaupod ko ikaw ha Paraiso.’

Makalilipay gud ito nga saad, diri ba? Maaram ka ba kon ano nga paraiso an ginsiring ni Jesus? Diin nahimumutang an paraiso nga ginhimo han Dios ha tinikangan? Oo, dinhi ha tuna. Ngan kon maghadi na hi Jesus ha langit, babanhawon niya ini nga tawo basi mag-ukoy ha bag-o nga Paraiso dinhi ha tuna. Makalilipay gud ito, diri ba?