HAN binaya hi Jesus ngan an iya mga apostol ha kwarto ha igbaw, kinanhi hira ha hardin han Getsemani. Makadamu na hira kumanhi. Hito nga takna, ginsidngan hira ni Jesus nga diri mangaturog kondi mag-ampo. Katapos, nagpahirayo hiya, ngan dinuko basi mag-ampo.

Han human na hi Jesus mag-ampo, binalik hiya ha iya mga apostol. Ha imo hunahuna, ano an ira ginbubuhat? Nangangaturog hira! Tulo ka beses nga ginsidngan hira ni Jesus nga diri mangaturog, kondi ha kada pagbabalik niya, iya naaabotan hira nga nangangaturog. ‘Nahingangaturog pa kamo ha sugad hini nga kahimtang?’ siring ni Jesus ha iya ultimo nga pagbalik. ‘Inabot na an oras nga itutubyan ako ha akon mga kaaway.’

Waray pag-iha, hinbatian nira an aringasa han damu nga tawo. Kitaa! May-ada hira dara nga mga espada ngan balbag! Ngan may-ada hira mga sulo. Han hirani na hira, usa ka tawo an binulag ngan dinuok kan Jesus. Iya ginharokan hi Jesus, sugad han imo nakikita dinhi ha retrato. Ito nga tawo amo hi Judas Iskariote. Kay ano nga ginharokan niya hi Jesus?

‘Judas, igintutubyan mo ba ako pinaagi hin harok?’ nagpakiana hi Jesus. Oo, usa nga tigaman an harok. Iginpapahibaro hito ha mga kaupod ni Judas nga an iya ginharokan amo hi Jesus, an tawo nga ira ginbibiling. Salit dinaop an mga kaaway ni Jesus basi dakpon hiya. Kondi karuyag ni Pedro nga depensahan hi Jesus ha mga nagdadakop ha iya. Salit, iya ginhulbot an iya espada ngan gintigbas an lalaki nga hirani ha iya. Waray maigo an ulo han lalaki pero napalong an iya too nga talinga. Kondi ginkamkam ni Jesus an talinga han lalaki ngan natambal ito.

Hi Jesus nagsiring kan Pedro: ‘Itakob an imo espada. Diri ka ba maaram nga makakaaro ako ha akon Amay hin yinukot nga anghel basi talwason ako?’ Oo, makakaaro hiya! Kondi waray mangaro hi Jesus ha Dios hin mga anghel tungod kay maaram hiya nga panahon na basi dakpon hiya han iya mga kaaway. Salit inupod hiya ha ira. Aton kitaon kon ano an sunod nga nahitabo kan Jesus.