NAKIKITA mo ba an malamrag nga bitoon nga gintutudlok han usa nga lalaki? Han binaya hira ha Jerusalem, nakita nira ito nga bitoon. Taga-Sinirangan ini nga mga lalaki, ngan nag-aaram hira mahitungod han mga bitoon. Natoo hira nga ini nga bag-o nga bitoon naggigiya ha ira ngadto ha importante nga tawo.

Han inabot ini nga mga lalaki ha Jerusalem, nagpakiana hira: ‘Hain an bata nga magigin hadi han mga Judio?’ An “mga Judio” amo an usa pa nga tawag ha mga Israelita. ‘Siyahan nga nakita namon an bitoon han nakadto pa kami ha Sinirangan ngan kinanhi kami basi singbahon an bata,’ siring han mga lalaki.

Han hinbaroan ini ni Herodes nga hadi han Jerusalem, nasubo hiya. Diri niya karuyag nga may-ada iba nga hadi nga masaliwan ha iya. Salit ginpatawag ni Herodes an punoan nga mga saserdote ngan nagpakiana: ‘Diin matatawo an igintagna nga hadi?’ Binaton hira: ‘An Biblia nasiring nga ha Betlehem.’

Salit iginpatawag ni Herodes an mga lalaki nga taga-Sinirangan, ngan nagsiring: ‘Lakat kamo ngan pamilnga an bata. Kon mabilngan niyo hiya, pahibaroa ako. Karuyag ko kumadto ngan magsingba liwat ha iya.’ Kondi, ha pagkatinuod, karuyag ni Herodes nga mabilngan an bata basi patayon!

Ngan an bitoon nag-uuna hini nga kalalakin-an tikadto ha Betlehem, ngan inundang ito ha igbaw han lugar nga gin-uukyan han bata. Han sinulod hira ha balay, nakita nira hi Maria ngan an bata nga hi Jesus. Igin-gawas nira an mga regalo ngan iginhatag ito kan Jesus. Kondi pinaagi han inop, ginpahamangnoan ni Jehova an mga lalaki nga diri bumalik ngadto kan Herodes. Salit pagbalik nira ha ira nasud, iba na nga dalan an ira inagian.

Han hinbaroan ni Herodes nga inuli na an mga lalaki nga taga-Sinirangan, nasina gud hiya. Salit nagsugo hiya nga pamatayon an ngatanan nga bata nga lalaki ha Betlehem nga dos anyos tipaubos an edad. Kondi pinaagi hin inop, abanse nga ginpahamangnoan ni Jehova hi Jose, ngan linakat hi Jose upod an iya pamilya pakadto ha Ehipto. Paglabay han panahon, han hinbaroan ni Jose nga patay na hi Herodes, inuli hira ha Nasaret. Dinhi nagdaku hi Jesus.

Ha imo hunahuna, hin-o an nagpalamrag hito nga bag-o nga bitoon? Hinumdumi, an mga lalaki kinadto anay kan Herodes ha Jerusalem katapos makit-an ini nga bitoon. Karuyag ni Satanas nga Yawa nga patayon an Anak han Dios, ngan maaram hiya nga mangangalimbasog hi Hadi Herodes nga patayon hi Jesus. Salit, posible nga hi Satanas an nagpalamrag hito nga bitoon.