DOSE anyos an bata nga babaye nga imo nakikita dinhi. Ginkakaptan ni Jesus an iya kamot, ngan an iya nanay ngan tatay natukdaw hirani ha iya. Maaram ka ba kon kay ano nga malipayon gud hira? Aton kitaon.

Hi Jairo, nga tatay hini nga bata, usa nga kilala nga tawo. Usa ka adlaw nagkasakit ini nga bata, salit naghinigda na la hiya. Diri hiya nag-oopay kondi nagtitikagrabe la lugod. Nababaraka gud hi Jairo ngan an iya asawa tungod kay baga hin mamamatay na an ira anak. Hiya la an ira anak nga babaye. Salit ginbiling ni Jairo hi Jesus tungod kay hinbatian niya an mga milagro nga ginbubuhat ni Jesus.

Han nakita ni Jairo hi Jesus, napapalibotan hi Jesus hin damu nga tawo. Kondi, nagpirit hiya nga makahirani kan Jesus ngan hinapa ha iya mga tiil. ‘Grabe an sakit han akon anak,’ siring ni Jairo. ‘Nanginginyupo ako, upod ha akon ngan tambala hiya,’ nakimalooy hiya. Nagsiring hi Jesus nga maupod hiya.

Samtang naglalakat hira, nagduduso-dusoay an mga tawo basi makahirani kan Jesus. Tigda nga inundang hi Jesus. ‘Hin-o an kinapot ha akon?’ nagpakiana hiya. Inabat ni Jesus nga may-ada gahum nga ginawas ha iya, salit maaram hiya nga may-ada kinapot ha iya. Kondi hin-o? Usa nga babaye nga 12 ka tuig na nga may-ada sakit. Dinuok hiya ngan ginkaptan an bado ni Jesus, ngan natambal hiya!

Tungod hini, mas sinarig hi Jairo kay nakita niya nga masayon gud la para kan Jesus an pagtambal. Kondi inabot an usa nga mensahero. ‘Ayaw na pag-isturboha hi Jesus,’ siring niya kan Jairo. ‘Patay na an imo anak.’ Nabatian ini ni Jesus ngan nagsiring hiya kan Jairo: ‘Ayaw kabaraka, mag-oopay hiya.’

Han inabot hira ha balay ni Jairo, nananangis an mga tawo tungod han duro nga kasubo. Kondi nagsiring hi Jesus: ‘Ayaw kamo pagtangis. Waray mamatay an bata. Nakaturog la hiya.’ Kondi gintinawaan ngan gintinuyawan nira hi Jesus tungod kay maaram hira nga patay na an bata.

Katapos, ginpasulod ni Jesus an tatay ngan nanay han bata ngan an iya tulo nga apostol ha kwarto nga hinihigdaan han bata. Ginkaptan niya an kamot han bata ngan nagsiring: ‘Buhat!’ Ngan nabuhi an bata, sugad la han imo nakikita dinhi. Ngan binuhat hiya ngan naglakat-lakat! Salit nalipay gud an iya nanay ngan tatay.

Diri hiya an siyahan nga ginbanhaw ni Jesus. An siyahan sumala ha Biblia amo an anak han balo nga naukoy ha Nain. Katapos, ginbanhaw liwat ni Jesus hi Lasaro nga bugto nira Maria ngan Marta. Ha pagmando ni Jesus sugad nga hadi han Dios, babanhawon niya an damu nga patay. Makalilipay gud ini!