MAY-ADA makangingirhat nga nahitabo. Ginpatay pa la hi Juan nga Parabawtismo. Nasisina ha iya hi Herodias nga asawa han hadi. Ngan naghimo hi Herodias hin paagi basi papugotan han hadi hi Juan.

Han hinbatian ini ni Jesus, nasubo gud hiya. Nag-uusahan hiya nga kinadto ha mamingaw nga lugar. Kondi sinunod ha iya an mga tawo. Han nakita hira ni Jesus, nalooy hiya ha ira. Salit ginsumatan niya hira mahitungod han ginhadian han Dios, ngan gintambal liwat niya an magsakit.

Hito nga gab-i dinaop ha iya an iya mga disipulo ngan nagsiring: ‘Gab-i na, ngan mamingaw ini nga lugar. Palakta hira basi makapalit hin pagkaon ha hirani nga mga baryo.’

‘Diri na hira kinahanglan lumakat,’ binaton hi Jesus. ‘Tagi hira hin pagkaon.’ Katapos, nagpakiana hiya kan Felipe: ‘Diin kita makakapalit hin pagkaon nga maigo hini ngatanan nga tawo?’

‘Kinahanglan hin damu nga kwarta basi makapalit hin gutiay nga pagkaon para ha kada usa,’ binaton hi Felipe. Ngan hi Andres nagyakan: ‘Ini nga bata nga nagdadara han aton pagkaon, may-ada lima ka bug-os nga tinapay ngan duha nga isda. Kondi diri gud ito maigo para hini ngatanan nga tawo.’

‘Palingkora an mga tawo ha kabanwaan,’ siring ni Jesus. Katapos, nagpasalamat hiya ha Dios para ha pagkaon, ngan gintipik-tipik ito. Sunod, ginpanagan han mga disipulo hin tinapay ngan isda an ngatanan. May-ada 5,000 nga kalalakin-an, ngan damu ka yukot nga kababayin-an ngan kabataan. Nangaon hira ngatanan tubtob nga nabusog. Ngan han gintirok han mga disipulo an nahisalin, napuno an 12 nga basket!

Katapos, ginsidngan ni Jesus an iya mga disipulo nga sumakay ha baluto basi tumabok ha Dagat han Galilea. Han gab-i na, binagyo hin makusog, ngan iginpalid-palid han mga balod an baluto. Nahadlok gud an mga disipulo. Katapos, ha katutnga han gab-i, nakita nira an usa nga tawo nga naglalakat ha bawbaw han tubig tipahirani ha ira. Nagsinggit hira tungod ha kahadlok kay diri hira makatoo ha ira nakikita.

‘Ayaw kamo kahadlok,’ siring ni Jesus. ‘Ako ini!’ Diri pa gihapon hira makatoo hito. Salit hi Pedro nagsiring: ‘Ginoo, kon ikaw gud ito, tuguti ako nga maglakat ha bawbaw han tubig ngada ha imo.’ Hi Jesus binaton: ‘Kadi!’ Ngan hi Pedro hinaw-as ha sakayan ngan naglakat ha bawbaw han tubig! Katapos, nahadlok hiya ngan nagtikalunod, kondi gintalwas hiya ni Jesus.

Katapos, nagpakaon na liwat hi Jesus hin yinukot nga tawo. Hini nga higayon, ginbuhat niya ito pinaagi han pito ka bug-os nga tinapay ngan pipira nga gudtiay nga isda. Ngan damu liwat an pagkaon para ha ngatanan. Urusahon gud an pagmangno ni Jesus ha katawohan, diri ba? Kon magmando na hiya sugad nga hadi han Dios, waray na gud kita kababarak-an!