NAKIKITA mo ba hi Jesus nga nalingkod dinhi? Gintututdoan niya ini nga mga tawo ha usa nga bukid ha Galilea. An nanlilingkod hirani ha iya amo an iya mga disipulo. Nagpili hiya hin 12 ha ira basi magin mga apostol. An mga apostol amo an espesyal nga mga disipulo ni Jesus. Maaram ka ba kon ano an ira mga ngaran?

Oo, an magbugto nga hira Simon Pedro ngan Andres, ngan hira Jakobo ngan Juan, nga magbugto liwat. May-ada apostol nga Jakobo liwat an ngaran, ngan usa pa nga Simon. Duha an apostol nga Judas an ngaran. An usa amo hi Judas Iskariote, ngan an usa pa nga Judas tinatawag nga Tadeo. Ngan hira Felipe ngan Nataniel (tinatawag liwat nga Bartolome), ngan hira Mateo ngan Tomas.

Pag-abot nira tikang ha Samaria, nagtikang pagsangyaw hi Jesus ha siyahan nga higayon: ‘Hirani na an ginhadian han langit.’ Maaram ka ba kon ano ito nga ginhadian? Tinuod ito nga gobyerno han Dios. Hi Jesus an hadi hito. Magmamando hiya tikang ha langit ngan maghahatag hin kamurayawan ha tuna. Pinaagi han ginhadian han Dios, an bug-os nga tuna magigin makaruruyag nga paraiso.

Gintututdoan dinhi ni Jesus an mga tawo mahitungod hito nga ginhadian. ‘Sadang kamo mag-ampo hin sugad hini,’ siring niya. ‘Amay namon ha langit, pagdayawon an imo ngaran. Kumanhi unta an imo ginhadian. Matuman unta ha tuna an imo kaburut-on, sugad ha langit.’ Gintatawag ini han mga tawo nga ‘Pag-ampo han Ginoo.’ Pero gintatawag ini han iba nga ‘Amay Namon.’ Memoryado mo ba ito nga pag-ampo?

Igintututdo liwat ni Jesus ha mga tawo kon paonan-o nira sadang trataron an kada tagsa. ‘Buhata ha iba an karuyag mo buhaton nira ha imo,’ siring niya. Karuyag mo nga trataron ka hin maopay han iba, diri ba? Salit, karuyag ipasabot ni Jesus nga kinahanglan trataron naton hin maopay an iba. Makalilipay gud ha paraiso nga tuna diin bubuhaton na ini han ngatanan!