Ginpangunahan ni Moises an mga Israelita ha paggawas ha Ehipto ngadto ha Bukid Sinai, diin iginhatag han Dios ha ira an Iya mga balaud. Katapos, nagsugo hi Moises hin 12 nga espiya basi usisahon an tuna han Kanaan. Kondi 10 ha ira an binalik nga may-ada maraot nga sumat. Salit karuyag han katawohan nga bumalik ha Ehipto. Tungod han ira kawaray pagtoo, ginsirotan hira han Dios nga maglinakat-lakat ha kamingawan ha sulod hin 40 ka tuig.

Inabot an panahon, ginpili hi Josue nga manguna ha mga Israelita ngadto ha Kanaan. Basi mabuligan hira nga masakop ito, nagbuhat hi Jehova hin mga milagro. Ginpaundang niya an pag-awas han Salog Jordan, ginrumpag an mga pader han Jeriko, ngan ginpugngan an pagtunod han adlaw. Paglabay hin unom ka tuig, nasakop nira an tuna han mga Kanaanhon.

Tikang kan Josue, 356 ka tuig nga nagmando an mga hukom ha Israel. Makikilala naton an damu ha ira, upod na hira Barak, Gideon, Jepte, Samson ngan Samuel. Mababasa liwat naton an mahitungod han kababayin-an sugad kanda Rahab, Debora, Jael, Rut, Noemi ngan Delila. Ha kabug-osan, 396 ka tuig an kahilawig han panhitabo nga ginhihisgotan ha Bahin TRES.