KITAA an mga prutas nga dara hini nga mga lalaki. Dagku gud an urapong han mga ubas. Duha nga lalaki an kinahanglan magpas-an hini pinaagi hin kahoy. Ngan kitaa an mga igos ngan granada nga prutas. Diin tikang inin mag-opay nga prutas? Tikang ha Kanaan. Hinumdumi, didto nag-ukoy hadto hira Abraham, Isaak ngan Jakob. Kondi tungod han gutom didto, binalhin hi Jakob ngan an iya pamilya ngadto ha Ehipto. Katapos, paglabay hin 216 ka tuig, ginpangunahan ni Moises an mga Israelita pagbalik ha Kanaan. Inabot hira ha usa nga lugar ha kamingawan nga tinatawag nga Kades.

Magraot an naukoy ha Kanaan. Salit nagsugo hi Moises hin 12 nga espiya, ngan ginsidngan hira: ‘Kitaa niyo kon pira kadamu an naukoy didto, ngan kon mationan-o hira kakusog. Usisaha kon an tuna maopay ba pagtanman. Ngan pagdara kamo hin mga prutas ha iyo pagbalik.’

Han binalik ha Kades an mga espiya, ginsumatan nira hi Moises: ‘Maopay gud ito nga tuna.’ Ngan basi pamatud-an ito, ira ipinakita kan Moises an mga prutas. Kondi an 10 nga espiya nagsiring: ‘An mga tawo nga naukoy didto dagku ngan magkusog. Pamamatayon kita nira kon kuhaon naton an tuna.’

Nahadlok an mga Israelita han hinbatian nira ini. ‘Mas maopay pa kon nagkamatay kami ha Ehipto o dinhi ha kamingawan,’ siring nira. ‘Pamamatayon kita ha girra, ngan magigin bihag an aton mga asawa ngan mga anak. Magpili kita hin bag-o nga lider nga masaliwan kan Moises, ngan mamalik kita ha Ehipto!’

Kondi an duha nga espiya nasarig kan Jehova, ngan ginpakalma nira an mga tawo. Josue ngan Kaleb an ira ngaran. Siring nira: ‘Ayaw kamo kahadlok. Kaupod naton hi Jehova. Masayon la masakop an tuna.’ Kondi waray mamati an mga tawo. Karuyag pa ngani nira nga patayon hira Josue ngan Kaleb.

Tungod hini, nasina gud hi Jehova, ngan ginsidngan hi Moises: ‘Waray bisan usa nga 20 anyos ngan sobra hito an makakasulod ha Kanaan. Nakita nira an akon mga milagro ha Ehipto ngan ha kamingawan, kondi diri la gihapon hira nasarig ha akon. Salit 40 ka tuig nga maglilinakat-lakat hira ha kamingawan tubtob nga mamatay hira ngatanan. Hira Josue ngan Kaleb la an makakasulod ha Kanaan.’