NAKAGSAAD ka na ba ngan nakurian ha pagtuman hito? Ini an nahitabo ha tawo dinhi ha retrato, salit nasubo gud hiya. Hiya hi Jepte, usa nga maisugon nga hukom han Israel.

Nabuhi hi Jepte ha panahon nga an mga Israelita diri na nagsisingba kan Jehova. Nagbubuhat na liwat hira hin maraot. Salit gintugotan ni Jehova nga pakurian hira han mga Amonitanhon. Tungod hito nakimalooy an mga Israelita kan Jehova: ‘Nakasala kami ha imo. Nanginginyupo kami, luwasa kami!’

Nagbasol an katawohan ha ira ginbuhat nga maraot. Iginpakita nira ito pinaagi ha pagsingba utro kan Jehova. Salit, ginbuligan na liwat hira ni Jehova.

Ginpili han katawohan hi Jepte nga manguna ha pakig-away ha magraot nga Amonitanhon. Karuyag gud ni Jepte nga buligan hiya ni Jehova hini nga away. Salit nagsaad hiya kan Jehova: ‘Kon padadaugon mo ako kontra ha mga Amonitanhon, an siyahan nga tawo nga magawas ha akon balay ha pagtapo ha akon, ihahatag ko hiya ha imo.’

Namati hi Jehova ha saad ni Jepte, ngan ginbuligan hiya nga magdaog. Pag-uli ni Jepte, maaram ka ba kon hin-o an siyahan nga ginawas ha pagtapo ha iya? An iya anak nga babaye, an iya usa la nga anak. ‘Abaadaw! an akon anak!’ nagtangis hi Jepte. ‘Napasubo mo gud ako. Kondi nagsaad ako kan Jehova, ngan diri ko ito mababawi.’

Han hinbaroan han anak ni Jepte an iya saad, ha siyahan nasubo liwat hiya. Tungod kay nagpapasabot ito nga babayaan niya an iya tatay ngan kasangkayan. Ngan mag-aalagad hiya kan Jehova ha Iya tabernakulo ha Shilo ha iya bug-os nga kinabuhi. Kondi, nagsiring hiya ha iya tatay: ‘Kon nagsaad ka kan Jehova, kinahanglan tumanon mo ito.’

Salit an anak ni Jepte kinadto ha Shilo ngan nag-alagad ha tabernakulo ni Jehova ha iya bug-os nga kinabuhi. Upat ka adlaw kada tuig an kababayin-an ha Israel nabisita ha iya didto, salit malipayon gud hira. Hinigugma gud han katawohan an anak ni Jepte tungod kay maopay hiya nga surugoon ni Jehova.