TINUOD ba ito nga halas nga nalangbod ha poste? Diri. Tumbaga ito nga halas. Ginsugo ni Jehova hi Moises nga ilangbod ito ha poste basi makita han mga tawo ngan diri hira mamatay. Kondi, tinuod an mga halas nga aada ha tuna. Gintukob hito nga mga halas an mga tawo ngan nagkasakit hira. Maaram ka ba kon kay ano?

Tungod kay an mga Israelita nagyakan kontra ha Dios ngan kan Moises. Nagreklamo hira: ‘Kay ano nga ginpagawas mo kami ha Ehipto basi mamatay dinhi hini nga kamingawan? Waray dinhi pagkaon ngan tubig. Ngan masumo na an pagkinaon hini nga manna.’

Kondi maopay nga pagkaon an manna. Milagroso nga iginhatag ito ni Jehova ha mga Israelita. Ngan milagroso nga iginhatag liwat niya ha ira an tubig. Kondi diri hira mapasalamaton ha paagi han pagtagana ni Jehova ha ira. Salit iginpadara niya ini nga maglara nga halas basi sirotan hira. Gintukob hira han mga halas, ngan damu an nagkamatay.

Katapos, an katawohan kinadto kan Moises ngan nagsiring: ‘Nakasala kami tungod kay nagyakan kami kontra kan Jehova ngan ha imo. Nanginginyupo kami nga mag-ampo ka kan Jehova nga kuhaon ini nga mga halas.’

Salit nag-ampo hi Moises para ha katawohan. Ngan ginsugo ni Jehova hi Moises nga maghimo hinin tumbaga nga halas. Siring Niya nga ilangbod ito ha poste, ngan kinahanglan kitaon ito han bisan hin-o nga gintukob. Ginbuhat ni Moises an ginsiring ni Jehova. Ngan an mga tawo nga gintukob, nagkita ha tumbaga nga halas ngan nag-opay hira.

May-ada kita mahibabaroan nga leksyon tikang hini. Maipapariho kita ngatanan ha mga Israelita nga gintukob hito nga mga halas. Kita ngatanan nagtitikamatay. Kitaa an palibot, ngan makikita mo nga an mga tawo nalalagas, nagkakasakit, ngan namamatay. Tungod ini kay waray sumugot kan Jehova an siyahan nga lalaki ngan babaye nga hira Adan ngan Eva ngan kita ngatanan mga anak nira. Kondi hi Jehova naghimo hin paagi basi kita mabuhi ha kadayonan.

Ginsugo ni Jehova nganhi ha tuna an iya Anak nga hi Jesu-Kristo. Iginraysang hi Jesus ha kahoy tungod kay damu an naghunahuna nga maraot hiya. Kondi ha pagkamatuod, iginhatag ni Jehova hi Jesus basi luwason kita. Kon tumoo ngan sumunod kita ha iya, magkakaada kita kinabuhi nga waray kataposan. Pero damu pa an mahibabaroan naton mahitungod hini.