KAY ano nga narurumpag ini nga mga pader han Jeriko? Sugad hin ginbombahan ito. Kondi hadto, waray pa mga bomba; waray ngani hira mga pusil. Usa na liwat ito nga milagro ni Jehova! Aton usisahon kon paonan-o ito nahitabo.

Pamati ha ginsiring ni Jehova kan Josue: ‘Ikaw ngan an imo mga sundalo kinahanglan magmartsa ha palibot han syudad. Pagmartsa hin makausa kada adlaw ha sulod hin unom ka adlaw. Pas-ana niyo an arka han kauyonan. Pito nga saserdote an mag-uuna ha iyo ngan maghuhuyop han ira mga budyong.

‘Ha ikapito ka adlaw, kinahanglan magmartsa kamo ha palibot han syudad hin pito ka beses. Katapos, patunoga niyo hin maiha an iyo mga budyong, ngan pasinggita an ngatanan hin makusog nga singgit han pakig-away, ngan marurumpag an mga pader!’

Ginbuhat ni Josue ngan han katawohan an ginsiring ni Jehova. Samtang nagmamartsa hira, mamingaw an ngatanan. Waray nagyayakan. An mababatian la amo an aringasa han mga budyong ngan han pagmartsa. Sigurado nga nahadlok gud ha katawohan han Dios an ira mga kaaway ha Jeriko. Nakikita mo ba an pula nga pisi nga nabitay ha bintana? Kanay ito bintana? Oo, kan Rahab ito. Iya ginbuhat an ginsiring ha iya han duha nga espiya. Hiya ngan an iya bug-os nga pamilya aadto ha sulod ngan nagkikita.

Ha ikapito ka adlaw, katapos han pagmartsa hin pito ka beses ha palibot han syudad, han pagpatunog han mga budyong, ngan han pagsinggit han mga sundalo, narumpag an mga pader. Katapos, hi Josue nagsiring: ‘Pamataya an ngatanan ha syudad ngan sunoga ito. Kondi isalin an salapi, bulawan, tumbaga ngan puthaw, ngan ibutang ito ha burutangan han bahandi ha tolda ni Jehova.’

Ha duha nga espiya, hi Josue nagsiring: ‘Kadto ha balay ni Rahab, ngan pagawsa hiya ngan an iya bug-os nga pamilya.’ Natalwas hi Rahab ngan an iya pamilya, sugad la han iginsaad ha iya han mga espiya.