MAARAM ka ba kon ano an ginpapamurot hini nga mga tawo? Oo, pariho ito han niebe. Busag, manipis ngan maragumok ito. Kondi diri ito niebe; nakakaon ito.

Mga usa pa la ka bulan tikang nga ginawas ha Ehipto an mga Israelita. Aanhi hira ha kamingawan. Gutiay la an mga tanom nga makakaon dinhi, salit nagreklamo hira: ‘Ginpatay na la unta kami ni Jehova ha Ehipto. Didto, amon nakakaon an ngatanan nga pagkaon nga amon naruruyagan.’

Salit hi Jehova nagsiring: ‘Magpapauran ako hin pagkaon tikang ha langit.’ Ngan ito an iya ginbuhat. Kinabuwasan, han nakita han mga Israelita an busag nga pariho han niebe, nagpakiana hira ha usa kag usa: ‘Ano ito?’

Hi Moises nagsiring: ‘Ito an pagkaon nga iginhatag ni Jehova ha iyo.’ Gintawag ito han mga tawo nga MANNA. An rasa hito pariho han manipis nga keyk nga may dugos.

‘Purota an maaakos la niyo kaunon,’ siring ni Moises. Salit kada aga, ito an ira ginbubuhat. Katapos, kon nasirak na, natutunaw an manna nga nahibilin ha tuna.

Hi Moises nagsiring liwat: ‘Waray magsasalin hin manna para ha sunod nga adlaw.’ Kondi waray mamati an iba. Maaram ka ba kon ano an nahitabo? Kinabuwasan, uluron ngan mabaho na an manna nga ira iginsalin!

Kondi, may-ada usa nga adlaw han semana nga ginsugo hira ni Jehova nga mamurot hin manna nga doble an kadamu. Ito an ikaunom ka adlaw. Ngan siring ni Jehova nga maghimos hito para ha sunod nga adlaw, tungod kay waray mahuhulog nga manna ha ikapito ka adlaw. Kon naghihimos hira para ha ikapito ka adlaw, diri ito gin-uulod ngan diri nagbabaho! Usa na liwat ito nga milagro!

Ha ngatanan nga katuigan nga an mga Israelita nakada ha kamingawan, ginpakaon hira ni Jehova hin manna.