HAN nagkaproblema an mga Israelita, nakimalooy hira kan Jehova. Ginbaton hira ni Jehova pinaagi ha paghatag ha ira hin mag-isog nga lider basi buligan hira. Ha Biblia, ini nga mga lider tinatawag nga mga hukom. Hi Josue an siyahan nga hukom, ngan an iba nga mga hukom nga sumunod ha iya amo hira Otniel, Aod ngan Samgar. Kondi duha nga babaye an binulig ha Israel, hira Debora ngan Jael.

Hi Debora usa nga propetisa. Iginsusumat ha iya ni Jehova an impormasyon mahitungod han tidaraon, katapos, iya iginsusumat ha katawohan an ginsiring ni Jehova. Hi Debora usa liwat nga hukom. Nalingkod hiya ha sirong han kahoy nga palma ha bungturon nga nasud, ngan nakadto ha iya an mga tawo basi magpabulig ha ira mga problema.

Hito nga panahon, hi Jabin an hadi ha Kanaan. May-ada hiya 900 nga karomata ha pakig-away. Makusog gud an iya kasundalohan salit damu nga Israelita an napiritan nga magpauripon kan Jabin. Hi Sisera an kumander han kasundalohan ni Hadi Jabin.

Usa ka adlaw, iginpatawag ni Debora hi Hukom Barak, ngan ginsumatan hiya: ‘Hi Jehova nagsiring: “Kuha hin 10,000 nga kalalakin-an ngan manguna ka ha ira ngadto ha Bukid Tabor. Didto akon itutubyan ha imo hi Sisera. Ngan ikaw an akon padadaugon hini nga away.”’

Hi Barak nagsiring kan Debora: ‘Makadto ako kon maupod ka ha akon.’ Inupod hi Debora, kondi nagsiring hiya kan Barak: ‘Diri ka pasisidunggan hini nga kadaogan tungod kay itutubyan ni Jehova hi Sisera ha usa nga babaye.’ Ngan ito an nahitabo.

Hi Barak linugsong ha Bukid Tabor basi atubangon an kasundalohan ni Sisera. Tigda nga nagpabaha hi Jehova, ngan damu han kaaway nga kasundalohan an nagkalulumos. Kondi hinaw-as hi Sisera ha iya karomata ngan pinalagiw.

Waray pag-iha, inabot hi Sisera ha tolda ni Jael. Ginpasulod hiya ni Jael ngan ginpainom hin gatas. Salit, waray pag-iha nahingaturog hiya. Katapos, nagkuha hi Jael hin usok han tolda ngan iginpukpok ito ha ulo hinin maraot nga tawo. Han inabot hi Barak, iginpakita ni Jael ha iya an patay nga hi Sisera! Salit natuman gud an ginsiring ni Debora.

Katapos, ginpatay liwat hi Hadi Jabin, ngan an mga Israelita nagkaada na liwat hin temporaryo nga kamurayawan.