NAGLABAY an katuigan—10 ka tuig, 20 ka tuig, 30 ka tuig, 39 ka tuig! Ngan an mga Israelita aada pa ha kamingawan. Kondi hini nga katuigan ginmangnoan ni Jehova an iya katawohan. Ginpakaon niya hira hin manna. Gin-giyahan niya hira pinaagi han harigi nga dampog kon adlaw ngan harigi nga kalayo kon gab-i. Hini nga katuigan waray madaan an ira mga bado ngan waray manhubag an ira mga tiil.

Ini yana an siyahan nga bulan han ika-40 ka tuig tikang nga ginawas an mga Israelita ha Ehipto. Nagkampo na liwat hira ha Kades. Dinhi hini nga lugar ginsugo an 12 nga espiya basi usisahon an Kanaan haros 40 ka tuig na an naglabay. Dinhi namatay an bugto ni Moises nga hi Miriam. Ngan pariho hadto, nagkaada na liwat problema dinhi.

Waray nakukuha nga tubig an katawohan. Salit nagreklamo hira kan Moises: ‘Mas maopay pa kon nagkamatay na la kami. Kay ano nga ginpagawas mo kami ha Ehipto ngan gindara nganhi hinin makuri nga lugar nga waray mga tanom? Waray lugas, waray igos, waray ubas, waray granada nga prutas. Waray ngani bisan tubig nga maiinom.’

Han hira Moises ngan Aaron sinulod ha tabernakulo basi mag-ampo, hi Jehova nagsiring kan Moises: ‘Tiroka an katawohan. Katapos, ha atubangan nira ngatanan, pagyakan ha bato. Magawas tikang hito an damu nga tubig para ha katawohan ngan ha ira mga hayop.’

Salit gintirok ni Moises an katawohan ngan nagsiring: ‘Pamati kamo, kamo nga waray pagsarig ha Dios! Ikukuha ba kamo namon ni Aaron hin tubig tikang hini nga bato?’ Katapos, duha ka beses nga ginbalbag ni Moises an bato ngan binugwak an tubig tikang hito. Inawas an damu nga tubig nga maiinom han katawohan ngan mga hayop.

Kondi nasina hi Jehova kanda Moises ngan Aaron. Maaram ka ba kon kay ano? Tungod kay hira Moises ngan Aaron nagsiring nga magpapagawas hira hin tubig tikang ha bato. Kondi ha pagkamatuod, hi Jehova an nagbuhat hito. Ngan tungod kay waray magsumat hira Moises ngan Aaron han kamatuoran mahitungod hini, nagsiring hi Jehova nga iya sisirotan hira. ‘Diri kamo an mangunguna han akon katawohan ngadto ha Kanaan,’ siring niya.

Waray pag-iha binaya an mga Israelita ha Kades. Ngan inabot dayon hira ha Bukid Hor. Dinhi namatay hi Aaron ha edad nga 123. Nasubo gud an mga Israelita, ngan 30 ka adlaw nga ira gintangisan hi Aaron. An iya anak nga hi Eleasar an nagin sunod nga hitaas nga saserdote ha Israel.