NAKIKITA mo ba kon ano an nahitatabo dinhi? Kasundalohan hira han Israel. An nanluluhod nga kalalakin-an, nanginginom. Hi Hukom Gideon an natindog hirani ha ira. Ginkikita niya kon paonan-o hira nanginginom han tubig.

Kitaa hin maopay an iba-iba nga paagi han pag-inom hini nga kalalakin-an. Iginduduot han iba an ira nawong ha tubig. Kondi ginsasarok han usa an tubig pinaagi han iya kamot, basi makita niya kon ano an nahitatabo ha iya palibot. Importante ini tungod kay ginsidngan ni Jehova hi Gideon nga pilion la an kalalakin-an nga padayon nga nagbabantay samtang nainom. An iba, siring han Dios, sadang paulion. Aton kitaon kon kay ano.

Damu na liwat an problema han mga Israelita. Tungod ito kay waray hira sumugot kan Jehova. Napirde hira han mga Medianitanhon ngan ginpapakurian hira. Salit nakimalooy an mga Israelita kan Jehova nga buligan hira, ngan namati hi Jehova ha ira.

Ginsidngan ni Jehova hi Gideon nga mag-organisa hin kasundalohan, salit nagtirok hiya hin 32,000 nga kalalakin-an. Kondi 135,000 an kasundalohan nga kaaway han Israel. Pero hi Jehova nagsiring kan Gideon: ‘Damu gud an imo kasundalohan.’ Kay ano nga ginsiring ito ni Jehova?

Tungod kay kon magdaog an Israel ha pakig-away, bangin maghunahuna hira nga nagdaog hira tungod han ira kalugaringon nga kusog. Bangin maghunahuna hira nga diri nira kinahanglan an bulig ni Jehova basi magdaog. Salit hi Jehova nagsiring kan Gideon: ‘Paulia an ngatanan nga kasundalohan nga nahahadlok.’ Han ginbuhat ito ni Gideon, 22,000 nga kasundalohan an nanguli. Salit 10,000 na la an nahibilin basi makig-away ha 135,000 nga kasundalohan.

Kondi, pamati! Hi Jehova nagsiring: ‘Damu pa hinduro an imo kasundalohan.’ Salit ginsidngan niya hi Gideon nga painumon an kalalakin-an dida hini nga sapa ngan paulion an ngatanan nga ininom nga iginduot an ira nawong ha tubig. Hi Jehova nagsaad: ‘Magdadaog ka ngan an 300 nga kalalakin-an nga padayon nga nagbabantay samtang nainom hira.’

Inabot an panahon ha pakig-away. Ginbahin ni Gideon an iya 300 nga kasundalohan ha tulo nga grupo. Gintagan niya an tagsa ha ira hin budyong ngan tibod nga may-ada sulo ha sulod hito. Han hirani na magkatutnga han gab-i, ginpalibotan nira an kampo han kaaway nga kasundalohan. Katapos, durungan nga ginhuyop nira an ira mga budyong ngan ginbuong an ira mga tibod ngan nagsinggit: ‘Kampilan ni Jehova ngan ni Gideon!’ Han nagkamata an kaaway nga kasundalohan, nalisang hira ngan nahadlok. Nagdadlagan hira ngatanan ngan nagdaog an mga Israelita ha pakig-away.