NAMIMELIGRO ini nga kalalakin-an. Kinahanglan makapalagiw hira, kay kon diri, pamamatayon hira. Israelita hira nga mga espiya, ngan an babaye nga nabulig ha ira amo hi Rahab. Naukoy hiya hini nga balay ha pader han syudad han Jeriko. Kitaon naton kon kay ano nga namimeligro ini nga kalalakin-an.

Andam na an mga Israelita ha pagtabok ha Salog Jordan ngadto ha Kanaan. Kondi antes hito, nagsugo hi Josue hin duha nga espiya. Nagsiring hiya ha ira: ‘Pakadto kamo ngan usisaha an tuna ngan an syudad han Jeriko.’

Han inabot an mga espiya ha Jeriko, kinadto hira ha balay ni Rahab. Kondi may-ada nagsumat ha hadi han Jeriko: ‘Duha nga Israelita an kinanhi yana nga gab-i basi mag-espiya.’ Han hinbatian ini han hadi, nagsugo hiya hin kalalakin-an nga kumadto kan Rahab, ngan nagsiring hira ha iya: ‘Pagawsa an mga tawo nga sinulod ha imo balay!’ Kondi igintago ni Rahab an mga espiya ha atop. Salit hiya nagsiring: ‘May-ada kinanhi ha akon nga mga tawo, kondi diri ako maaram kon tikang diin hira. Linakat hira han nagtitikasirom pa la, antes sadhan an ganghaan han syudad. Kon magdagmit kamo, hiaabotan niyo hira!’ Salit ginlanat han kalalakin-an an mga espiya.

Pagbaya nira, nagdagmit hi Rahab ngadto ha atop. ‘Maaram ako nga ihahatag ha iyo ni Jehova ini nga tuna,’ siring niya ha mga espiya. ‘Hinbatian namon kon paonan-o Niya ginpamara an Dagat nga Pula han binaya kamo ha Ehipto, ngan kon paonan-o niyo ginpamatay an mga hadi nga hira Sihon ngan Og. Pinaid ako ha iyo, salit nakikimalooy ako, magsaad kamo nga pumaid liwat kamo ha akon. Luwasa hi tatay ngan hi nanay, ngan an akon kabugtoan.’

Nagsaad an mga espiya nga bubuhaton nira ito, kondi kinahanglan may-ada pagbuhaton hi Rahab. An mga espiya nagsiring: ‘Kuhaa ini nga pula nga pisi ngan ihigot ini ha imo bintana ngan tiroka ha imo balay an ngatanan nga imo paryente. Ngan pagbalik namon ha pagbungkag han Jeriko, makikita namon ini nga pisi ha imo bintana ngan waray bisan usa ha imo balay an papatayon.’ Han binalik an mga espiya kan Josue, ira ginsumatan hiya han ngatanan nga nahitabo.